ប្រទេសសិង្ហបុរី បានក្រើនរំលឹកដល់ក្រុមវេជ្ជបណ្ឌិតរបស់ខ្លួន ឲ្យមានការប្រុងប្រយត្ន័ទប់ទល់នឹងជម្ងឺគ្រុនឈាម ក្រោយពីមានករណីជំងឺគ្រុនឈាមឆ្នាំនេះបានកើនឡើងយ៉ាងខ្លាំង។
ជាប្រទេសដែលតូចជាងគេនៅក្នុងភូមិភាគអាស៊ីអាគ្នេយិ៍ ប្រទេសសិង្ហបុរី ចាប់តាំងពីខែមករាដើមឆ្នាំ ២០១៣នេះមក មានករណីជំងឺគ្រុនឈាមជាង ៩០០០ ករណី ហើយជំងឺនេះថែមទាំងបានសម្លាប់មនុស្សអស់២នាក់ផងដែរ។ តួលេខនេះមានចំនួនច្រើនជាងតួលេខឆ្នាំចាស់ ដល់ទៅ ២ដង ឯណោះ។
ក្រសួងសុខាភិបាលប្រទេសសិង្ហបុរី បានឲ្យដឹងថា ខ្លួនបានក្រើនរំលឹកដល់គ្លីនិកទាំងឡាយតាមមូលដ្ឋានដែលមានការរីករាលដាលជំងឺគ្រុនឈាមនោះ ហើយខ្លួនក៏បានប្រាប់ដល់បុគ្គលិកពេទ្យនានាឲ្យធ្វើរោគវិនិច្ឆ័យឲ្យបានលឿនទាន់ពេលវេលា និងតាមដានអ្នកជំងឺឲ្យបានល្អ។
ជំងឺគ្រុនឈាម ឆ្លងដោយមេរោគម៉្យាងដែលមានក្នុងមូសខ្លា (Aedes aegypti) ហើយច្រើនកើតមានក្នុងភូមិភាគអាស៊ី និងអាមេរិកឡាទីន។ ក្នុងករណីធ្ងន់ធ្ងរ ជំងឺនេះអាចនាំឲ្យមានឈាមហូរក្នុងខ្លួន, ថ្លើមឡើងធំខុសធម្មតា, ដាច់ប្រព័ន្ធសរសៃឈាម និងឈានទៅដល់ការបាត់បង់ជីវិត។
បើតាមប្រសាសន៍របស់វេជ្ជបណ្ឌិត Asok Kurup ឲ្យដឹងថា មូលហេតុមួយដែលធ្វើឲ្យមានការកើនឡើងនូវករណីជំងឺគ្រុនឈាមនៅឆ្នាំនេះ គឺថាវីរុសនៃជំងឺនេះទំនងជាបង្ហាញនូវកម្លាំងខ្លាំងជាងមុន និងមានការសុំាទៅនឹងថ្នាំពេទ្យ៕
ប្រភព៖ វិទ្យុអូស្ត្រាលី
