សុខភាពថ្ងៃនេះ: ឳសថ

Showing posts with label ឳសថ. Show all posts

Thursday, February 21, 2013

អ្វីទៅជា ថ្នាំ Diane 35 ?

Thursday, February 21, 2013 ឳសថ

ឱសថជាអាវុធមុខពីរ អាចព្យាបាលជំងឺផង តែក៏អាចសម្លាប់ជីវិតមនុស្សបានដែរ ! មិនខុសអ្វីពីពិសពស់នោះទេ។ រូបពស់ ដែលត្រូវបានជ្រើសរើសមកធ្វើតំណាងនៅតាមឱសថស្ថាននានា មិនមែនជាការចៃដន្យឡើយ។ មានមនុស្សមិនតិចទេ ដែលបានរងគ្រោះព្រោះការប្រើប្រាស់ថ្នាំ ក្នុងបំណងព្យាបាល ឬការពារជំងឺអ្វីមួយនោះ។ ជាក់ស្តែងនៅក្នុងពេលថ្មីៗ នៅប្រទេសបារាំង មានស្ត្រីជាច្រើនបាននាំគ្នាដាក់ពាក្យបណ្តឹង បន្ទាប់ពីបានប្រើប្រាស់ថ្នាំ Diane ៣៥។ Diane ៣៥ ដែលនឹងត្រូវផ្អាកឈប់ធ្វើចរាចរណ៍លើទីផ្សារចាប់ពីចុងខែមីនា ឆ្នាំ២០១៣នេះតទៅ នៅប្រទេសបារាំង។ តើ Diane ៣៥ ជាអ្វី ?

បទសម្ភាសន៍របស់ អៀង សុខម៉ិញ ជាមួយឱសថការី ឃុន វ៉ារី

(07:37)

(ប្រភព៖វិទ្យុបារាំងអន្តរជាតិ)

អានលម្អិត

Thursday, January 10, 2013

ដំបូន្មាន១០យ៉ាងក្នុងការប្រើប្រាស់ឱសថដោយខ្លួនឯង

Thursday, January 10, 2013 ចំណេះដឹងទូទៅ, ថ្នាំពេទ្យ, ឳសថ

នៅប្រទេសកម្ពុជា គឺជាការពេញនិយមខ្លាំងណាស់ចំពោះការប្រើប្រាស់ឱសថដោយខ្លួនឯង។ តាមការប៉ាន់ប្រមាណ ប្រជាពលរដ្ឋញខ្មែរមិនតិចជាង៧០%ទេ ដែលប្រើប្រាស់ឱសថដោយខ្លួនឯង។ ករណីនេះ កំពុងបង្កគ្រោះថ្នាក់យ៉ាងធំដល់សុខភាព និងសុខុមាលភាពប្រជាពលរដ្ឋយ៉ាងចម្រូងចម្រាស់បំផុត។ ដើម្បីជួយបង្ហាញផ្លូវដល់ប្រជាពលរដ្ឋខ្មែរ យើងខ្ញុំសូមណែនាំជូនអំពីរបៀបប្រើប្រាស់ឱសថត្រឹមត្រូវដោយខ្លួនឯង និងដោយវេជ្ជបញ្ជា នៅលើទំព័ររបស់ខ្លួនចាប់ពីពេលនេះតទៅ។

ជារៀងរាល់ថ្ងៃ មនុស្សម្នាក់ៗតែងតែមានជម្ងឺ និងឈឺថ្កាត់បន្ដិចបន្ដួចមិនអាចចៀសផុតឡើយ។ ជម្ងឺខ្លះធ្ងន់ ជម្ងឺខ្លះទៀតស្រាល។ លោកអ្នកអាចសម្រេចប្រើប្រាស់ឱសថ ឬថ្នាំសង្កូវដោយខ្លួនឯង ឬតាមរយៈវេជ្ជបញ្ជា ប៉ុន្ដែគ្រូពេទ្យខ្លះក៏ទូន្មានដល់អ្នកជម្ងឺឱ្យប្រើប្រាស់បន្ថែម ឬបន្ដក្នុងករណីមិនទាន់ជាដាច់ ឬលាប់ឡើងវិញជាដើម ពោលទៅតាមករណីនីមួយៗ។ ដើម្បីធានាបានការអនុវត្ដត្រឹមត្រូវ និងប្រកបទៅដោយសុវត្ថិភាព ការប្រើប្រាស់ឱសថដោយខ្លួនឯង អាចធ្វើទៅបានតែត្រូវគោរពគោលការណ៍មួយចំនួន។

1 . សូមសួរយោបល់ឱសថការី ដែលប្រចាំការនៅឱសថស្ថាន
ទោះបីជាឱសថភាគច្រើនត្រូវបានគិតគូរពីសុវត្ថិភាព និងប្រសិទ្ធភាពបែបណាក្ដី ប៉ុន្ដែមុននឹងសម្រេចទិញឬប្រើឱសថណាមួយដែលគ្មានវេជ្ជបញ្ជា គួរតែត្រូវទទួលព័ត៌មានគ្រប់គ្រាន់ជាមុនសិន។ ឱសថការីគឺជាអ្នកវិជ្ជាជីវៈមួយដែលទទួលការបណ្ដុះបណ្ដាល យ៉ាងតិចបំផុត៥ឆ្នាំ ដើម្បីឈរឈ្មោះជាអ្នកបើកឱសថស្ថាន និងផ្ដល់ដំបូន្មានដល់អតិថិជនអំពីឱសថ និងការប្រើប្រាស់របស់វា។ ឱសថការីជាអ្នកទទួលបន្ទុកផ្ដល់ដំបូន្មានអំពីឱសថ ដែលអាចប្រើឱសថបាន និងកាលៈទេសៈប្រើប្រាស់។ សូមកុំច្រឡំអ្នកលក់ឱសថ និងឱសថការី។ ជាក្រឹត្យក្រម នៅឱសថស្ថានមួយត្រូវមានឱសថការីប្រចាំការ។

2 . សូមពិគ្រោះគ្រូពេទ្យរបស់លោកអ្នកក្នុងករណីសង្ស័យ ករណីមានផ្ទៃពោះ បំបៅដោះកូន ឬសម្រាប់ទារកប្រើប្រាស់
មុនពេលព្យាបាល តោងដឹងអំពីបញ្ហាសុខភាព ដែលចោទជាបញ្ហា និងត្រូវព្យាបាល។ មានតែជម្ងឺឬអាការរោគដែលស្គាល់ច្បាស់ទេ ទើបនាំឱ្យមានការសម្រេចចិត្ដថាប្រើប្រាស់ឱសថដោយខ្លួនឯងប្រកបទៅដោយ ហេតុផល។ ករណីរោគសញ្ញាជម្ងឺនៅសង្ស័យមិនទាន់ច្បាស់ ឈឺគំហុក និងកើតមានមិនឈប់ លោកអ្នកត្រូវទៅពិគ្រោះជាមួយគ្រូពេទ្យដើម្បីទទួលបានការពិនិត្យសុខភាព ស៊ីជម្រៅ។ អាចជាករណីផងដែរ បើសិនជាការប្រើប្រាស់ឱសថនោះនៅតែមិនមានការប្រសើរឡើង។ ចំពោះករណីស្ដ្រីមានផ្ទៃពោះ ស្ដ្រីដែលបំបៅដោះកូន និងទារក ពួកគេមិនត្រូវទទួលទានឱសថណាមួយដោយគ្មានដំបូន្មានគ្រូពេទ្យនោះទេ។

3 . សូមប្រើប្រាស់ឱសថដោយខ្លួនឯង តែក្នុងរយៈពេលមួយសមស្របតែប៉ុណ្ណោះ
ករណីស្ថានភាពសុខភាពទូទៅរឹតតែធ្ងន់ធ្ងរនៅពេលកំពុងព្យាបាល លេបថ្នាំដោយខ្លួនឯង ឬមិនមានការប្រសើរឡើងទាល់តែសោះ ការពិគ្រោះជម្ងឺ ឬការពិគ្រោះវេជ្ជសាស្ដ្រមួយត្រូវធ្វើឡើងជាដាច់ខាត មិនត្រូវបណ្ដែតបណ្ដោយនោះឡើយ។ គ្រប់ករណីទាំង អស់ លោកអ្នកត្រូវមើលកាលបរិច្ឆេទប្រើប្រាស់ មិនត្រូវប្រើប្រាស់ឱសថដែលហួសកាលកំណត់ដែលបានសរសេរនៅលើប្រអប់នោះ ទេ។

4 . សូមកុំអនុវត្ដការប្រើប្រាស់ឱសថដោយខ្លួនឯងបែបលាក់លៀម
ប្រសិនបើលោកអ្នកពិគ្រោះជាមួយគ្រូពេទ្យបន្ទាប់ពីនិន្នាការនៃការ ប្រើប្រាស់ឱសថដោយខ្លួនឯងមិនមានប្រសិទ្ធភាព សូមកុំលាក់លៀមការព្យាបាល ឬលេបថ្នាំដែលលោកអ្នកបានធ្វើដោយខ្លួនឯង ឬលោកអ្នកកំពុងបន្ដធ្វើនៅឡើយ។ គ្រូពេទ្យធ្លាប់ដឹងរួចមកហើយថា អ្នកជម្ងឺរបស់ខ្លួនធ្លាប់សាកល្បងព្យាបាលដោយខ្លួនឯងរួចមកហើយ មុននឹងគេឱ្យខ្លួនព្យាបាល ជាពិសេសករណីឈឺបន្ដិចបន្ដួច។ គ្រូពេទ្យល្អពិតជាមិនរិះគន់ និងថ្កោលទោសអ្នកជម្ងឺរបស់ខ្លួននោះឡើយ។

5 . សូមអានព័ត៌មានឱសថ និងមើលសម្បកប្រអប់
សម្បកប្រអប់ឱសថមិនមែនប្រើសម្រាប់តែវេចខ្ចប់ឱសថប៉ុណ្ណោះទេ ប៉ុន្ដែក៏មានប្រាប់អំពីរបៀបប្រើប្រាស់ និងព័ត៌មាន អំពីឱសថនានា ដូចជាឈ្មោះថ្នាំ អ្នកផលិត ធាតុផ្សំសកម្ម ថ្ងៃខែឆ្នាំកំណត់ប្រើប្រាស់ជាដើម។ ហេតុនេះគួរថែរក្សាសម្បកប្រអប់ និងព័ត៌មានឱសថទាំងនោះទុកនៅកន្លែងសុវត្ថិភាពមួយ។
សូមអានប័ណ្ណព័ត៌មានឱសថដោយប្រុងប្រយ័ត្ន។ ប័ណ្ណនេះប្រាប់លោកអ្នកអំពីរបៀបប្រើប្រាស់ ជម្ងឺដែលត្រូវប្រើធាតុផ្សំ ទម្រង់សណ្ឋាន កម្រិតប្រើប្រាស់ទៅតាមអាយុ ឬទម្ងន់ រយៈពេលប្រើប្រាស់ព្យាបាលមុននឹងទៅជួបគ្រូពេទ្យ ប្រការប្រុងប្រយ័ត្ន ឥទ្ធិពលអាក្រក់ដែលអាចកើតមាន និងរបៀបថែរក្សាទុកដាក់ឱសថ។

6 . សូមចៀសវាងការប្រើប្រាស់ឱសថច្រើនមុខ
ការលេបថ្នាំច្រើនមុខដំណាលគ្នា អាចនាំឱ្យមានប្រសិទ្ធភាពខ្ពស់ ឬផ្ទុយទៅវិញអាចកាត់បន្ថយប្រសិទ្ធភាព ឬជួនពេលទៀតអាចបង្កើននូវឥទ្ធិពលគ្រោះថ្នាក់ដែលមិនចង់បាន (ឥទ្ធិពលទី២)។ ពេញមួយរយៈពេលព្យាបាលដោយវេជ្ជបញ្ជា លោកអ្នកត្រូវប្រាប់គ្រូពេទ្យឱ្យអស់នូវការប្រើប្រាស់ឱសថផ្សេងទៀតដោយ ខ្លួនឯង ដែលលោកអ្នកកំពុងធ្វើផងដែរ។

7 . សូមចៀសវាងទទួលទានស្រាពេលលេបថ្នាំ
ជាតិអាល់កុល ឬស្រា អាចធ្វើឱសថជាច្រើនប្រែប្រួលប្រសិទ្ធភាព និងបង្កើនគ្រោះថ្នាក់នៃឥទ្ធិពលអាក្រក់ ឬឥទ្ធិពលទី២។ ដូចគ្នាទៅនឹងឱសថមួយចំនួនដែរ ស្រាអាចកាត់បន្ថយលឿនប្រតិកម្មជាខ្លាំង ដែលជាការប្រុងប្រយ័ត្នយ៉ាងខ្លាំងក្លាសម្រាប់ការបើកបររថយន្ដ ឬការបញ្ជាម៉ាស៊ីនអ្វីមួយ។

8 . សូមរក្សាទុកដាក់ឱសថឱ្យបានត្រឹមត្រូវ
ក្រោមឥទ្ធិពលនៃពន្លឺ កម្ដៅ ឬសំណើម ឱសថអាចខូចគុណភាព។ ដើម្បីថែរក្សាទុកឱ្យបានត្រឹមត្រូវ សូមទុកវានៅម្លប់ ត្រជាក់ល្មម និងកន្លែងស្ងួត។ រឹតតែប្រសើរ លោកអ្នកអាចទិញទូសម្រាប់ថែរក្សាទុកដាក់ឱសថ។

9 . សូមទុកដាក់ថ្នាំឱ្យឆ្ងាយពីដៃក្មេង
ដើម្បីបញ្ចៀសគ្រោះថ្នាក់ជាចាំបាច់លោកអ្នកត្រូវទុកដាក់រក្សាទុកឱសថ ឱ្យនៅឆ្ងាយពីដៃក្មេង នៅទីកន្លែងខ្ពស់ ឬក្នុងទូមួយបិទជិតដោយសោរ។ មិនគួរទុកដាក់ឱសថនៅក្នុងថតតុក្នុងបន្ទប់គេង ធ្នើរនៅក្នុងចង្ក្រានបាយ ឬក្នុងបន្ទប់ទឹកនោះទេ បើមិនមានសោរចាក់បិទជិតនោះទេ។ មានករណីលើកលែងខុសពីគោលការណ៍នេះ ថ្នាំបង្ការ(វ៉ាក់សាំង) និងថ្នាំសុលបូករួមទាំងថ្នាំ ម្សៅ ឬទឹកម្សៅ(ថ្នាំផ្សះ ឬអង់ទីប៊ីយូទិច)អាចទុកដាក់នៅក្នុងទូទឹកកកបាន។ ប៉ុន្ដែសូមទុកដាក់រុញវាទៅឱ្យជ្រៅជាន់លើគេ ប៉ុន្ដែមិន ត្រូវទុកដាក់រហូតភ្លេចយកមកប្រើនោះទេ។

10 . ត្រូវហ៊ានបោះបង់ចោលការប្រើប្រាស់ឱសថដោយខ្លួនឯង
ព្យាបាលដោយគ្មានការពិគ្រោះវេជ្ជសាស្ដ្រ អាចធ្វើទៅបានសម្រាប់តែករណីជម្ងឺដែលស្គាល់ច្បាស់ ឬវិនិច្ឆ័យរោគពិតប្រាកដតែប៉ុណ្ណោះ។ ករណីមានជម្ងឺរ៉ាំរ៉ៃមួយចំនួន ជាអាទិជម្ងឺទឹកនោមផ្អែម ជម្ងឺបេះដូង ជម្ងឺខ្សោយប្រព័ន្ធការពារ ជម្ងឺថ្លើម ឬជម្ងឺតម្រង់នោម លោកអ្នកត្រូវពិគ្រោះជាមួយគ្រូពេទ្យជាមុន មុនលេបថ្នាំអ្វីមួយ ទោះបីជាករណីជម្ងឺ ឬអាការរោគតិចតួចក្ដី។ ដូចគ្នាផងដែរ ករណីដែលមានអាការរោគ ឬជម្ងឺដែលមិនអាចពន្យល់បាន ក៏លោកអ្នកមិនគួរសម្រេចចិត្ដប្រើប្រាស់ឱសថដោយខ្លួនឯងនោះទេ។

(ប្រភព ៖ ទស្សនាវដ្តី សុខភាពយើង លេខ០៦៩ ខែតុលា ឆ្នាំ២០១១)

អានលម្អិត

Saturday, January 5, 2013

របៀបប្រើប្រាស់ម្រុំជាឳសថ

Saturday, January 05, 2013 ចំណេះដឹងទូទៅ, បន្លែ, ឳសថ, ឳសថបុរាណ

១. ម្រុំជាដើមឈើទិព្វ អាចធ្វើជាអាហារបំប៉ននិងព្យាបាលជម្ងឺបានជាង ៣០០ប្រភេទ
តាមការស្រាវជ្រាវដោយអ្នកប្រាជ្ញធំៗជាច្រើន នៅលើពិភពលោក នៅទ្វីបអាហ្រ្វិក, អាមេរិក, អាស៊ី និង អឺរ៉ុប បានរកឃើញថា : ម្រុំមានផ្ទុកនូវជីវជាតិ (Vitamins) ជាង ១០០មុខ និង សារជាតិជួយការពាររាងកាយមនុស្ស (Antioxidants) ចំនួន ៤៦មុខ ដែលមាននាទីកាត់បន្ថយភាពជ្រីវជ្រួញ។ ដោយសារគុណភាពនេះ ម្រុំអាចព្យាបាល ជម្ងឺជាង ៣០០ប្រភេទ។ ម្សៅស្លឹកម្រុំ១០០ក្រាម មាន គុណភាពស្មើនឹងជាតិវីតាមីន-សេ នៅក្នុងក្រូច៧ផ្លែ, ជាតិកាល់ស្យូម នៅក្នុងទឹកដោះគោ៤កែវ, ជាតិវីតាមីន-អា នៅក្នុងការ៉ុត៤ផ្លែ និង ជាតិប៉ូតាស្យូម នៅក្នុងចេក៣ផ្លែ។ បច្ចុប្បន្ន ផលិតផលពីដើមម្រុំ ជាពិសេសម្សៅស្លឹកម្រុំ ត្រូវបានដាក់លក់ជាទូទៅនៅពាសពេញ ពិភពលោក ក្នុងតម្លៃប្រមាណ ៤០ ទៅ ៥០ដុល្លា ក្នុងមួយគីឡូក្រាម។ រីឯនៅកម្ពុជាវិញ តម្លៃលក់ជាមធ្យមប្រមាណ ១០ដុល្លា។

២. ម្រុំអាចព្យាបាលជម្ងឺជាអាទិ៍ :
• រោគស្រ្តេស (Stress) តប់ប្រមល់ ខ្វល់ខ្វាយក្នុងអារម្មណ៍ គេងមិនលក់
• រោគខ្វះឈាមនិងរោគលើសឈាម ធ្វើឱ្យមានចលនាឈាមបានល្អប្រសើរ
• រោគទឹកនោមផ្អែម ដោយបន្ថយអត្រាជាតិស្ករក្នុងឈាមបានយ៉ាងសក្តិសិទ្ធិ
• ជម្ងឺថ្លើមគ្រប់ប្រភេទ
• រោគផ្លូវដង្ហើម ដូចជារលាកច្រមុះ-បំពង់ក, រលាកទងសួត, រោគហឺត ជាដើម។
• រោគផ្លូវរំលាយអាហារ ដំបៅក្រពះ-ពោះវៀន
• លាងក្រពះ-ពោះវៀន (ថ្នាំបញ្ចុះ) ក្នុងករណីប្រើប្រាស់លើសកម្រិត (Overdose)
• សម្រក់ទម្ងន់។

* សម្គាល់
(១) ពេលទទួលទានម្សៅម្រុំ ៣-៤ថ្ងៃដំបូង អ្នកខ្លះអាចមានអាការៈវិលមុខ ធីងធោង ងងុយគេង។ នោះគឺជាការធម្មតា សូមព្យាយាមទទួលទានបន្តទៅទៀត។
(២) ដោយសារវាជាថ្នាំធម្មជាតិ យើងមិនមែនទទួលទានតែមួយពេល ឬមួយថ្ងៃ បានទទួលលទ្ធផលភ្លាមនោះទេ។ សូមទទួលទានឱ្យបានទៀងទាត់យ៉ាងហោចណាស់ចាប់ពី ៣ខែឡើងទៅ ទើបមានប្រសិទ្ធភាពពិតប្រាកដ។

៣. វិធីយកម្រុំធ្វើជាឱសថ
ក- ផ្លែ : ទទួលទានឆៅ ជួយទម្លាក់សត្វល្អិត, ព្យាបាលរោគរាគរូស, ជម្ងឺថ្លើម និង បញ្ហាលំពែង ព្រមទាំងបំបាត់ការឈឺចាប់តាមសន្លាក់ ដោយសារតែវាមានជាតិប្រូតេអ៊ីននិងសរសៃរច្រើន។
ខ- ស្លឹក : អាចយកទៅស្លរធ្វើជាអាហារបំប៉ន ឬ យកទៅហាលឱ្យស្ងួតសម្រាប់ឆុងធ្វើតែ។ ក្នុងករណីចង់បានជីវជាតិច្រើនជាងនេះ គេយកស្លឹកដែលហាលស្ងួតទៅបុកធ្វើជាម្សៅដែលអាចទទួល ទានបាន ដោយអក ឬ ដោយឆុងជាមួយទឹកក្តៅធ្វើជាតែ រួចផឹក (បើអាចផឹកទាំងកាកបាន ក៏កាន់តែប្រសើរ)។

៤. របៀបធ្វើម្សៅស្លឹកម្រុំ
• កាត់មែក និង លួសយកតែស្លឹក
• លាងសំអាត និង សំដិលក្នុងម្លប់ រយៈពេល១៥នាទី
• ច្បូតយកស្លឹកចេញពីទង
• ហាលស្លឹកទាំងនោះក្នុងម្លប់ ឱ្យមានភាពស្រួយខ្ញោក (២ ទៅ ៣ថ្ងៃ)
• បុកស្លឹកដែលហាលស្ងួតទាំងនោះ ដើម្បីធ្វើជាម្សៅម្រុំ
• រែងយកកំទេចកំទីឬកាកធំៗចេញពីម្សៅដែលបុករួច
• ច្រកថង់ឬក្រឡ ហើយរក្សាទុកក្នុងទីកន្លែងងងឹត។

៥. កម្រិតប្រើប្រាស់ម្រុំជាមធ្យម (តាមធម្មតា)
• ក្មេងខ្វះជីវជាតិ មានរាងកាយស្គមស្គាំង ត្រូវញ៉ាំម្សៅម្រុំ ១ស្លាបព្រាបាយ ក្នុងមួយថ្ងៃ ៣ដង។
• អ្នកទើបងើបពីឈឺ មានសុខភាពទន់ខ្សោយ ត្រូវញ៉ាំម្សៅម្រុំ ១ស្លាបព្រាបាយ ក្នុងមួយថ្ងៃ ២ដង។
• ស្រ្តីមានផ្ទៃពោះ ឬស្រ្តីបំបៅដោះកូន ត្រូវញ៉ាំម្សៅម្រុំ ១ស្លាបព្រាបាយ ក្នុងមួយថ្ងៃ ៦ដង។
• អ្នកមានសុខភាពល្អហើយ ប៉ុន្តែចង់ថែទាំសុខភាពឱ្យបានល្អប្រសើរ ត្រូវញ៉ាំម្សៅម្រុំ ០១ ស្លាបព្រាបាយ ក្នុងមួយថ្ងៃ ១ដង។

៦. របៀបដាំដើមម្រុំ
• យកគ្រាប់ពូជទៅវេចខ្ចប់នឹងក្រណាត់ឬក្រមា ហើយជ្រលក់ក្នុងទឹក រួចស្រង់ចេញទុកចោលរយៈពេល ១យប់។
• បន្ទាប់មក យកគ្រាប់ពូជទៅកប់ក្នុងកន្ទោង ជម្រៅរាក់ជាងមួយថ្នាំងដៃ។ ក្នុងចន្លោះ២សប្តាហ៍ គ្រាប់ពូជចាប់ផ្តើមចេញពន្លក។
• ទុកចោលឱ្យវាលូតលាស់រហូតដល់កំពស់ពី ១០ ទៅ ១៥សង់ទីម៉ែត្រ ក្នុងរយៈពេលប្រមាណ១៥ថ្ងៃ។
• យកកូនដើមម្រុំនោះទៅដាំនៅលើដីដែលមិនរលាំទឹក ដោយក្នុងរណ្តៅត្រូវដាក់ជីកំប៉ុស្តផង។
• បើការដាក់ជីនិងថែរក្សាបានល្អ យើងអាចយកស្លឹកមកប្រើប្រាស់ក្នុងរយៈពេលប្រមាណជា ៣ខែ តែប៉ុណ្ណោះ។

អានលម្អិត

Friday, January 4, 2013

ប្រការគ្រោះថ្នាក់នៅពេលកិនថ្នាំគ្រាប់ និងដោះសម្បកថ្នាំចេញ

Friday, January 04, 2013 ចំណេះដឹងទូទៅ, ឳសថ

ភ្នំពេញ: ស្ថិតិបង្ហាញថា មានមនុស្សចាស់ប្រមាណ៦០ភាគរយជួបបញ្ហាពេលលេបថ្នាំ។ ដូច្នេះហើយមនុស្សជាច្រើនបានយកថ្នាំទៅកិនឲ្យម៉ដ្ឋ ឬដោះសម្បកថ្នាំចេញ ដើម្បីឱ្យស្រួលលេប។ ប្រការនេះអាចបង្ករការគ្រោះថ្នាក់បំផុតដល់សុខភាពក៏ដូចជាអាយុជីវិតផងដែរ។

     បើតាមក្រុមជំនាញការសុខាភិបាលឲ្យដឹងថា ប្រសិនជាអ្នកប្រើមានការពិបាកលេបថ្នាំគ្រាប់នោះ គេគួរប្តូរទៅប្រើប្រភេទថ្នាំទឹក, ថ្នាំហឺត, ថ្នាំបិទជ្រាបតាមស្បែក… ព្រោះការកិនថ្នាំដើម្បីផឹក វានឹងបង្កផលវិបាកធ្ងន់ និងថែមទាំងអាចបណ្តាលឱ្យបាត់បង់ជីវិតទៀតផង។
មូលហេតុ គឺដោយសារថ្នាំជាច្រើនប្រភេទត្រូវបានផ្សំជាគ្រាប់, សំដៅកែសម្រួលល្បឿនថ្នាំជ្រាបចូលទៅក្នុងប្រព័ន្ធចរាចរឈាម។ ពេលថ្នាំត្រូវកិន ល្បឿនថ្នាំជ្រាបប្រែប្រួល ហើយអ្នកប្រើប្រាស់ងាយត្រូវពុលដោយសារប្រើហួសកម្រិត។ ពពួកថ្នាំប្រើប្រាស់តែម្តងក្នុងមួយថ្ងៃ តែងត្រូវបានផ្សំជាគ្រាប់យ៉ាងពិសេស សំដៅជួយឱ្យសារជាតិរំញោចចូលទៅក្នុងឈាមសន្សឹមៗ និងស្មើ ក្នុងរង្វង់២៤ម៉ោង។ ពេលកិន, កម្រិតថ្នាំត្រូវជ្រាបចូលដំបូងយ៉ាងខ្ពស់ រួចហើយពុំមាននៅសល់អ្វីសម្រាប់អំឡុងពេលនៅសល់។
   ខាងក្រោមនេះ ជាប្រភេទថ្នាំមួយចំនួនដែលអ្នកប្រើប្រាស់ត្រូវចងចាំមិនភ្លេចថា ដាច់ខាតមិនត្រូវកិន ឬដោះសម្បកថ្នាំចេញ : Tamoxifen (ច្រើនត្រូវបានចេញវេជ្ជបញ្ជាសម្រាប់អ្នកជំងឺមហារីកដោះ, អ្នកកិនអាចហឺតចូលកម្ទេចថ្នាំ ហើយប្រសិនជាអ្នកកំពុងមានផ្ទៃពោះ គឺគ្រោះថ្នាក់បំផុត), Morphine (ប្រើសម្រាប់បន្ថយការឈឺចាប់ក្នុងបណ្តាករណីឈឺចាប់ធ្ងន់ធ្ងរ ដូចជាមហារីក ប្រសិនកិន នឹងត្រូវហួសកម្រិត ព្រោះ Morphine ត្រូវបានស្រូបចូលសរីរាង្គយ៉ាងរហ័ស), Nifedipine (ឱសថប្រើសម្រាប់ព្យាបាលឈឺចុកដើមទ្រូង និងលើសឈាម ប្រសិនកិនទៅជាម្សៅ, អ្នកប្រើប្រាស់ងាយនឹងគ្រោះថ្នាក់ ត្រូវស្ត្រូក ឬគាំងបេះដូង, ស្រាលជាង គឺឈឺក្បាល, ងងឹតមុខ)។
   ចំណែកពពួកឱសថដែលមានសរសេរអក្សរ ឬតួលេខដូចជា: 12-hour, 24-hour, CC, CD, CR, ER, LA, Retard, SA, Slo-, SR, XL,…នោះ, ដាច់ខាតមិនត្រូវកិន ឬក៏ដោះសម្បកចេញដីម្បីយកម្សៅផឹក៕

(ដាច់ខាតមិនត្រូវកិន ឬក៏ដោះសម្បកចេញដីម្បីយកម្សៅផឹក)

អានលម្អិត

Tuesday, January 1, 2013

ឱសថផលិតពីពិសរបស់ខ្ទួយ ព្យាបាលបាន រោគមហារីក៥

Tuesday, January 01, 2013 ចំណេះដឹងទូទៅ, ឳសថ, ឳសថបុរាណ

ក្រៅពីឧស្សាហកម្មស្ករអំពៅ ប្រទេសគុយបាត្រូវបានពិភពលោកទទួលស្កាល់ពីការអភិវឌ្ឍន៍លើផ្នែក វេជ្ជសាស្ត្រ ។ វាពុំមែនជាការចៃដន្យទេ ដែលប្រធានាធិបតីប្រទេសអ្នកមាន វេណេហ្ស៊ុយអេឡា (លោកឆាវ៉េ) បានជ្រើសយកជាកន្លែងព្យាបាលរោគមហារីករបស់ខ្លួន ។

ថ្មីៗនេះ ពួកអ្នកវិទ្យាសាស្ត្រនៃប្រទេសគុយបាបានប្រកាសក្នុងសន្និសីទឯកទេស ដែលមានប្រធានបទ "Serving life" ថាពួកគេទទួលបានជោគជ័យក្នុងផលិតប្រភេទឱសថ Vidatox CH ពីពិសរបស់សត្វខ្ទួយ (ខ្យាដំរី -Scorpion) ខៀវនៅតំបន់ប៉ែកខាងលិចប្រទេសនេះ ។ ឱសថនេះអាចព្យាបាលរោគមហារីកថ្លើម សុដន់ ខួរក្បាល ក្រពេញប្រូស្តាត និងមហារីកសួត ។
ឱសថ Vidatox ត្រូវបានផលិតដោយសម្ព័ន្ធក្រុមហ៊ុន ឱសថ Labiofam គុយបាដែលវាអាចបង្កើនអត្រារួចផុតពីការស្លាប់នៃអ្នកជំងឺមហារីក ទប់ស្កាត់ការរាលដាលនៃកោសិកាមហារីក និងកែសម្រួលសុខភាពរបស់អ្នកជំងឺ ។

មហារីកជាជំងឺសម្លាប់មនុស្ស លំដាប់ទី២នៅប្រទេសនេះ ដែលក្នុង១ឆ្នាំៗ មានពលរដ្ឋគុយបាប្រមាណ ១៨.០០០នាក់ បានស្លាប់ដោយសារវា ។
អាស្រ័យហេតុនេះ គុយបា បានបញ្ចេញលក់ប្រភេទវ៉ាក់សាំង៤ ដែលក្រសួងសុខាភិបាលខ្លួនបានអនុម័តទៅកាន់ទីផ្សារនៃប្រទេសចំនួន២៦ នៅទ្វីបអាមេរិកឡាទីន ទ្វីបអាស៊ី និងទ្វីបអាហ្វ្រិក ។ នោះជាប្រភេទវ៉ាក់សាំង(ពុំមែនឱសថ Vidatox ទេ) កំដៅកាត់បន្ថយគ្រោះថ្នាក់ នៃការប្រើកាំរស្មី វិទ្យុសកម្ម និងសារធាតុគីមីដើម្បីព្យាបាលមហារីក ហើយវាក៏ជា "ឱសថពិសេស" ក្នុងការប្រឆាំងតបតនឹងដុំពកមហារីក ៕

អានលម្អិត

Tuesday, December 25, 2012

ថ្នាំងងុយគេងអាចបង្កើនហានិភ័យជំងឺរលាកសួត

Tuesday, December 25, 2012 ចំណេះដឹងទូទៅ, ឳសថ

អ្នកស្រាវជ្រាវ ជនជាតិអង់គ្លេសបានធ្វើសេចក្តីរាយការណ៍ថា អ្នកដែលប្រើប្រាស់ថ្នាំសណ្តំ ឬថ្នាំងងុយគេងដែលត្រូវបានគេស្គាល់ថា benzodiazepines អាចបង្កអោយមានហានិភ័យក្នុងការវិវត្តទៅជាជំងឺរលាកសួត។

អ្នកស្រាវជ្រាវ បានបន្ថែមថា លើសពីនេះទៅទៀត, ពួកគេក៏អាចប្រឈមមុខទៅនឹងការកើនឡើងហានិភ័យនៃការស្លាប់ពីជំងឺនោះ ផងដែរ។ ថ្នាំbenzodiazepines ដែលមានដូចជា Halcyon, Librium, Valium និង Xanax ត្រូវបានគេប្រើជាញឹកញាប់ចំពោះជំងឺថប់បារម្ភ, ជំងឺឆ្កួតជ្រូក, ជាប់សាច់ដុំ និងគេងមិនលក់។

វេជ្ជបណ្ឌិត រ៉ូប៊ឺត សាន់ដឺរ (Robert Sanders) ដែលមកពីសាកលវិទ្យាល័យ London បាននិយាយថា ការស្រាវជ្រាវរបស់យើងបានប្រាប់សំណួរដែលទាក់ទងទៅនឹងសុវត្ថិភាពនៃ ការប្រើប្រាស់ថ្នាំ benzodiazepine ក្នុងស្ថានភាពនៃការឆ្លងមេរោគ។

គាត់បាន និយាយថា ខណៈពេលដែលការស្រាវជ្រាវទៅថ្ងៃក្រោយគឺចាំបាច់នោះ, ការស្រាវជ្រាវដំបូងនេះបង្ហាញថា ការប្រើប្រាស់ថ្នាំ benzodiazepineអាចបង្កើនហានិភ័យនៃការវិវត្តទៅជាជំងឺរលាកសួត ឬស្លាប់ដោយសារជំងឺរលាកសួត។

ចំពោះ ការស្រាវជ្រាវ, ក្រុមរបស់សាន់ដឺរបានវិភាគទៅលើអ្នកជំងឺដែលបានធ្វើនៅក្នុង ការស្រាវជ្រាវនៃ Health Improvement Network database។

ជាពិសេស, ពួកគេបានមើលទៅលើអ្នកជំងឺជិត ៥.០០០នាក់ដែលត្រូវបានធ្វើរោគវិនិច្ឆ័យឃើញថាមានជំងឺរលាកសួតចន្លោះ ឆ្នាំ២០០១ ដល់ឆ្នាំ២០០២។ អ្នកស្រាវជ្រាវបានប្រៀបធៀបអ្នកជំងឺទាំងនោះទៅនឹងអ្នកជំងឺ២៩.៥០០នាក់ ផ្សេងទៀតដែលមិនមានជំងឺរលាកសួត។

អ្នកជំងឺដែល មានជំងឺរលាកសួតបានទទួលរងនឹងជំងឺរលាកសួតនេះមុន ឬស្របពេលនឹងមានជំងឺដទៃទៀតមកជាមួយដូចជា ការគាំងបេះដូង, ជំងឺធ្លាក់ទឹកចិត្ត និងជំងឺវិកលចរិត។ អ្នកស្រាវជ្រាវបានសម្គាល់ថា បន្ថែមពីលើនេះ, ពួកគេក៏ហាក់ដូចជាជក់បារីផងដែរ។

ក្រុមរបស់សាន់ ដឺរបានប្រៀបធៀបនៃការប្រើប្រាស់ថ្នាំ benzodiazepines ចំពោះក្រុមទាំងពីរនោះ។ ពួកគេក៏បានមើលលើការប្រើប្រាស់ថ្នាំ zopiclone (Imovane) ដែលមិនមានសកម្មភាពដូច benzodiazepines នោះទេ។

ការស្រាវជ្រាវ បានចង្អុលបង្ហាញថា ថ្នាំ benzodiazepinesត្រូវបានទាក់ទងជាមួយនឹងការកើនឡើងហានិភ័យនៃ ការវិវត្តទៅជាជំងឺរលាកសួតដល់ទៅ៥៤%៕

អានលម្អិត

Friday, December 14, 2012

វីតាមីន B9: អ្វីដែលស្ត្រីគួរយកចិត្តទុកដាក់់សម្រាប់ផ្ទៃពោះ

Friday, December 14, 2012 វីតាមីន, ឳសថ

វីតាមីន B9 អាចកាត់បន្ថយការមានកូន កើតជំងឺឆ្អឹងខ្នង ឬការខូចបំពង់សរសៃប្រសាទផ្សេងៗទៀត។ នៅពេលអាស៊ីតហ្វូលិកចូលទៅក្នុងខ្លួន វាត្រូវបំលែងទៅជា Folate។

មនុស្សស្រីកំពុងតែមានគម្រោងចង់បានកូនត្រូវតែទទួលទានវីតាមីន B9 នេះយ៉ាងហោចណាស់ក៏មួយខែមុនមានផ្ទៃពោះដែរ ហើយពេលមានផ្ទៃពោះចូរទទួលទានអោយបាន ៣ខែដំបូង។

របៀបទទួលបានវីតាមីន Folate ច្រើន

មធ្យោបាយដ៏មានប្រសិទ្ធភាព និងងាយស្រួលបំផុតគឺទទួលទានគ្រាប់វីតាមីនអាស៊ីតហ្វូលិកដែលមានចំនុះរបស់វា ០,៥មីលីក្រាម ជារៀងរាល់ថ្ងៃ។

•    វីតាមីនអាស៊ីតហ្វូលិកមានសុវត្ថិភាពណាស់

•    ថ្នាំគ្រាប់អាស៊ីតហ្វូលិកអាចរកទិញបាននៅតាមហាងលក់ថ្នាំ និងផ្សារទំនើប

•    មិនចាំបាច់មានវេជ្ជបញ្ជាក៏អាចទិញបាន ហើយមានតម្លៃថោក

•    ថ្នាំគ្រាប់វីតាមីនចំរុះមិនមានវីតាមីនអាស៊ីតហ្វូលិកច្រើនទេ

ស្ត្រីមួយចំនួនត្រូវការវីតាមីនអាស៊ីតហ្វូលិកច្រើនជាងធម្មតាប្រសិនបើពួកគេ៖

•    ធ្លាប់មានកូនកើតមកខូចបំពង់សរសៃប្រសាទ

•    សាច់ញាតិម្នាក់ដែលមានជំងឺខូចបំពង់សរសៃប្រសាទ

•    ពកឆ្អឹងខ្នង

•    កំពុងតែប្រើថ្នាំមួយចំនួន

ចូរទៅពិគ្រោះជាមួយគ្រូពេទ្យដើម្បីទទួលបាននូវដំបូន្មានក្នុងការប្រើប្រាស់៕

អានលម្អិត

ផលរំខាន នៃការប្រើប្រាស់ថ្នាំគ្រាប់ ម៉ុលទីវីតាមីន (Multivitamin )

Friday, December 14, 2012 វីតាមីន, ឳសថ

ចំពោះវប្បធម៌នាពេលបច្ចុប្បន្ននេះ ដែលតម្រូវអោយអ្នកធ្វើការ ២៤ម៉ោង បានធ្វើអោយ របបអាហារដែលអ្នក បានទទួលទាន គឺពិតជាមានឥទ្ធិពលដ៏ អាក្រក់ចំពោះសុខភាពអ្នក។
វិធីសាស្ត្រតែមួយគត់ សម្រាប់របបអាហារប្រចាំថ្ងៃនោះគឺថា អ្នកត្រូវទទួលទាន និង ចំអិនអាហារ ដែលនឹងមិនចំណាយពេលយូរ ហេតុដូចនេះហើយ ទើបបានជា អាហារដែល បានចំអិនដាក់លក់រួចជាស្រេច និង ថ្នាំគ្រាប់ម៉ុលទីវីតាមីន ហាក់នឹងមានភាពពេញនិយម ចំពោះមនុស្សនាសម័យនេះ។ បញ្ហានឹងចាប់កើតមាន នៅពេលដែល ភាគច្រើននៃយើងទាំងអស់គ្នា មិនបានដឹងពីកម្រិតនៃថ្នាំម៉ុលទីវីតាមីនដែលអ្នកគួរប្រើ នៅក្នុងរយៈ ពេលមួយថ្ងៃ។ ថ្នាំគ្រាប់ម៉ុលទីវីតាមីន ត្រូវបានប្រើសម្រាប់អ្នកដែលខ្វះ នូវសារជាតិទាំងនេះ ហើយការលេបវា ដោយមិនបានគិតពីបរិមាណត្រឹមត្រូវ នោះវានឹងធ្វើអោយអ្នក មានជំងឺធ្ងន់ធ្ងរ។ ផលរំខាននៃថ្នាំគ្រាប់ប្រភេទនេះ គឺពិតជាមាន ភាពគ្រោះថ្នាក់ណាស់។
ទាំងនេះគឺជា ផលរំខាននៃថ្នាំគ្រាប់ម៉ុលទីវីតាមីន ដែលតែងតែកើតមាន ៖

១. មានជំងឺរាគ
      បញ្ហាមួយ ក្នុងចំណោមផលរំខាននៃថ្នាំគ្រាប់ម៉ុលទីវីតាមីន ដែលតែងតែ កើតមាននោះគឺ ការរាគ។ នោះគឺ ដោយសារតែ កម្រិតខ្ពស់នៃជាតិម៉ាញ៉េស្យូម ដែលធ្វើអោយប្រព័ន្ធពោះវៀនរបស់អ្នកមានដំណើរការមិនល្អ។ ជំងឺរាគដែលកើតមាន ដោយសារការទទួល ថ្នាំគ្រាប់ម៉ុលទីក្នុងកម្រិតច្រើនជ្រុល នឹងបណ្តាលអោយមានអន្តរកម្ម ជាអវិជ្ជមាន ចំពោះសារជាតិបំប៉នដទៃទៀត ហើយវាក៏អាចនាំអោយមានបញ្ហាសុខភាពដទៃទៀតដូចជា៖ ចុះខ្សោយ, មិនសូវមានប្រព័ន្ធការពារនឹងមេរោគ និង កាត់បន្ថយដល់ការរំលាយអាហារ។ ហើយការបាត់បង់ជាតិ ទឹក ដោយសារការរាគ គឺជាផលប៉ះពាល់ដ៏ចំបងមួយ ចំពោះសុខភាព។

២. មានជំងឺគ្រួសក្នុងតម្រងនោម
       មូលហេតុជាទូទៅ ដែលបណ្តាលអោយអ្នក មានជំងឺគ្រួសក្នុងតម្រងនោមនោះគឺ ដោយសារតែកម្រិតកំហាប់ ខ្ពស់ នៃជាតិកាល់ស្យូម។ ដូច្នេះ ផលរំខានមួយនៃថ្នាំគ្រាប់ម៉ុលទីវីតាមីននេះគឺ វាមានផ្ទុកកំហាប់នៃជាតិកាល់ស្យូម ដ៏ខ្ពស់ ដែលវានឹងបណ្តាលអោយអ្នកមានជំងឺគ្រួសក្នុងតម្រងនោម រួមជាមួយផងដែរនូវបញ្ហាផ្សេងៗដទៃទៀតមាន ដូចជា៖ ការទល់លាមក, ឈឺចាប់ក្នុងពោះ និង ក្នុងករណីខ្លះទៀត គឺធ្វើអោយបេះដូងអ្នកចុះខ្សោយ។

៣. ធ្វើអោយមានបញ្ហាបេះដូង
       ការមានផ្ទុកនូវកំហាប់ដ៏ខ្ពស់នៃជាតិស័ង្កសី គឺនាំអោយមានការបង្អាក់ដល់ ចង្វាក់បេះដូង ដែលជាលទ្ធផលគឺ វាធ្វើអោយបេះដូងចុះខ្សោយ។ ការខ្សោយបេះដូងក្នុង រយៈពេលយូរនេះ អាចនឹងធ្វើអោយអ្នកមានជំងឺគាំងបេះដូង ។ ផលរំខានផ្សេងទៀត ដែលកើតមានដោយសារតែកំហាប់សារជាតិស័ង្កសីខ្ពស់នេះ មានដូចជាមានស្នាមប្រលាក់ ជាប់ធ្មេញ, មានជាតិឧស្ម័ន, មានបញ្ហានៅក្នុងទឹកនោម និង មានភាពអន់ថយចំពោះសាច់ដុំ ។

ផលរំខានផ្សេងទៀត ដែលមានបណ្តាលមកពីថ្នាំគ្រាប់ម៉ុលទីវីតាមីន

១. ដោយយោងតាម ការសិក្សាស្រាវជ្រាវមួយចំនួន កម្រិតកំហាប់ខ្ពស់នៃសារជាតិវីតាមីន A , E និង សារជាតិបេតាការ៉ូតែន (beta- carotene) គឺហាក់នឹងធ្វើអោយអាយុកាលរបស់ មនុស្សមានរយៈពេលខ្លី។ សារជាតិនៃកំហាប់វីតាមីន A ខ្ពស់ ក៏បានធ្វើអោយមានការបំផ្លាញដល់រ៉េទីនភ្នែក ដែលមានភាពគ្រោះថ្នាក់បំផុត ចំពោះស្ត្រី។ វាក៏អាចបង្អាក់ដល់ ដំណើរការពរពោះរបស់ មនុស្សស្រីបានផងដែរ។

២. ថ្នាំគ្រាប់ម៉ុលទីវីតាមីន ក៏អាចមានប្រតិកម្មជាមួយនឹង ថ្នាំគ្រាប់ផ្សេងទៀតបានផងដែរ។ ការមានប្រតិកម្មនេះ អាចធ្វើអោយ មានប្រតិកម្មអាលែហ្សី និង ផ្តល់ផលមិនល្អចំពោះសុខភាព។

៣. ការមានផ្ទុកកំហាប់សារជាតិ កាល់ស្យូម និង ជាតិដែកខ្ពស់ គឺអាចបង្អាក់ដល់ សម្ថភាពរាងកាយ ក្នុងការបឺត ស្រូបយកសារជាតិបំប៉នផ្សេងៗទៀត។

៤. ការលើសកម្រិតនៃសារជាតិវីតាមីន C ត្រូវបានគេអះអាងថា វាធ្វើអោយតម្រងនោមអ្នក ចុះខ្សោយ និង មានការ បាត់បង់ជាតិទឹក។

៥. ផលរំខានបន្តិចបន្តួចផ្សេងៗទៀត មានដូចជា៖ ជ្រុះសក់, សាច់ដុំចុះខ្សោយ,មានការហូរឈាមផ្នែកខាងក្នុង,របកស្បែក និង មិនសូវឃ្លានអាហារ។
ថ្នាំគ្រាប់ម៉ុលទីវីតាមីន គឺបានផ្តល់អត្ថប្រយោជន៍ដល់ មនុស្សទាំងឡាយណា ដែលត្រូវការវា ដូច្នេះហើយ អ្នកគួរតែ ទទួលទានវា ទៅតាមការណែនាំរបស់គ្រូពេទ្យ។ ជាទូទៅវាត្រូវបានគេ អនុញ្ញាតអោយទទួលទាន ក្នុងរយៈពេល កំណត់ជាក់លាក់ណាមួយ ។ ដូចនេះ នៅថ្ងៃក្រោយ មុនពេលអ្នកសម្រេចចិត្តទទួលទានវា នោះអ្នកត្រូវចង ចាំពី ផលរំខាន ដែលអ្នកនឹងអាចជួបវា នាថ្ងៃអនាគត៕

អានលម្អិត

វីតាមីន B3 :អ្វីដែលអ្នកត្រូវដឹងដើម្បីសុខភាព

Friday, December 14, 2012 វីតាមីន, ឳសថ

Niacin គឺជាវីតាមីន B3 មួយប្រភេទ។វាគឺជាប្រភេទវីតាមីនដែលរលាយក្នុងទឹក ហើយវាមិនត្រូវបានរក្សាទុកនៅក្នុងខ្លួនមនុស្ស ទេ។ កាកសំណងរបស់វីតាមីននេះនឹងចេញពីក្នុងខ្លួនតាមរយៈទឹកនោម។ នេះមានន័យថា អ្នកត្រូវតែមានការផ្គត់ផ្គងលើវីតាមីននេះតាមរយៈរបបអាហាររបស់អ្នកជាប់រហូត។
មុខងារ ៖

វីតាមីន B3 ជំនួយដល់ប្រព័ន្ធរំលាយអាហារ ស្បែក និងសរសៃប្រសាទអោយមានមុខងារល្អ។ មិន ត្រឹមតែប៉ុណ្ណោះវាក៏មានសារៈសំខាន់សម្រាប់បំឡែងអាហារដែលទទួលទានរួចទៅជាថាមពល ដែរ។

អាហារសម្បូរវីតាមីនB3

វីតាមីន B3 ត្រូវបានរកឃើញនៅក្នុងអាហារដូចជា៖

    ផលិតផលធ្វើពីទឹកដោះគោ
    ស៊ុត
    នំបុ័ង និងគ្រាប់ធុញ្ញជាតិកែច្នៃ
    ត្រី
    សាច់សុទ្ធ
    សណ្តែកគ្រាម
    គ្រាប់ផ្លែឈើ
    សាច់បក្សី

វីតាមីន B3 និងជំងឺបេះដូង-សរសៃឈាម

ដោយស្ថិតនៅក្រោមការត្រួតពិនិត្យរបស់អ្នកផ្តល់សេវាថែទាំសុខភាពម្នាក់ អ្នកអាចទទួលទានវី តាមីន B3 ពី ១ ទៅ៣ក្រាមក្នុងមួយថ្ងៃដើម្បីព្យាបាលបញ្ហាកម្រិតជាតិខ្លាញ់កូឡេស្ទើរ៉ុល HDL (ខ្លាញ់ល្អ) ចុះទាប និងខ្លាញ់កូឡេស្តេរ៉ុល LDL (ខ្លាញ់អាក្រក់) ព្រមទាំខ្លាញ់ Triglyceride ឡើងខ្ពស់។ នៅពេលធ្លាប់វាសម្រាប់ព្យាបាលបញ្ហាខ្លាញ់ក្នុងឈាម វីតាមីន B3 តែងតែបែងចែកពេល វេលាប្រើប្រាស់ជាបី ឬបួនពេលក្នុងមួយថ្ងៃ។ វីតាមីន B3 ប្រភេទ Nicotinamide មិនមានឥទ្ធិពលលើ ជាតិខ្លាញ់ក្នុងឈាមឡើយ។

ផលរំខាន

ការដែលកង្វះវីតាមីន B3 ក្នុងខ្លួននឹងបង្កជាជំងឺ Pellagra ដែលរោគសញ្ញារបស់វាមានដូចជា៖

·         មានបញ្ហាលើការរំលាយអាហារ

·         រលាកស្បែក

·         មានបញ្ហាលើផ្លូវចិត្ត

ការដែលមានចំនួនវីតាមីន B3 ច្រើនពេកអាចបង្កអោយទៅជា៖

    បង្កើននូវបរិមាណជាតិស្ករក្នុងឈាម
    ខូចថ្លើម
    ដំបៅក្រពះ
    កន្ទួលលើស្បែក

ទោះបីជាកម្រិតនៃវីតាមីន B3 ធម្មតាក៏អាចធ្វើអោយមានបញ្ហាក្រហមស្បែកដែរ។ ប៉ុន្តែទម្រង់វីតាមីន B3 ទម្រង់ថ្មីបានកាត់បន្ថយនូវផលរំខាននេះហើយ។ វីតាមីន B3 ប្រភេទ Nicotinamide មិនបង្កជាផលរំខានទាំងនេះទេ។

ការណែនាំ

តម្លៃធម្មតាលើការទទួលទានរបបអាហារសម្រាប់វីតាមីន B3

ទារក

    ០-៦ខែ៖ ២មីលីក្រាមក្នុងមួយថ្ងៃ (2mg/day)
    ៧-១២ខែ៖ ៤មីលីក្រាមក្នុងមួយថ្ងៃ (4mg/day)

ការទទួលទានដែលគ្រាប់គ្រាន់

កូនក្មេង

    ១-៣ឆ្នាំ៖ ៦មីលីក្រាមក្នុងមួយថ្ងៃ
    ៤-៨ឆ្នាំ៖ ៨មីលីក្រាមក្នុងមួយថ្ងៃ
    ៩-១២ឆ្នាំ៖ ១២មីលីក្រាមក្នុងមួយថ្ងៃ

មនុស្សវ័យជំទង់

    បុរសអាយុចាប់ពី ១៤ឆ្នាំឡើងទៅ៖ ១៦មីលីក្រាមក្នុងមួយថ្ងៃ
    ស្ត្រីអាយុចាប់ពី ១៤ឆ្នាំឡើងទៅ៖ ១៤មីលីក្រាមក្នុងមួយថ្ងៃ

តម្លៃនៃការណែនាំជាពិសេសអាស្រ័យទៅលើអាយុ ភេទ និងកត្តាផ្សេង (ដូចជាការមានផ្ទៃពោះ)។ ស្ត្រីដែលមានផ្ទៃពោះ ឬកំពុងបំបៅដោះកូនត្រូវការចំនួនច្រើនជាងនេះ។ ចូរសុំយោបលពីអ្នកផ្តល់ សេវាថែទាំសុខភាពរបស់អ្នកអំពីចំនួនដែលល្អបំផុតសម្រាប់អ្នក។
មធ្យោបាយដ៏ល្អបំផុតដើម្បីទទួលបានវីតាមីនសំខាន់ៗតាមតម្រូវការប្រចាំថ្ងៃគឺត្រូវទទួលអាហារ អោយមានតុល្យភាពដែលផ្ទុកទៅដោយអាហារច្រើនប្រភេទ៕

អានលម្អិត

វីតាមីនE:ប្រើច្រើនហួសអាចនាំអោយហូរឈាមក្នុងខួរក្បាលធ្ងន់ធ្ងរ

Friday, December 14, 2012 វីតាមីន, ឳសថ

វីតាមីនE គឺជាវីតាមីនដែលរលាយក្នុងខ្លាញ់។

ឈ្មោះដទៃទៀតៈ អាល់ហ្វា-តូកូហ្វេរ៉ុល និង ហ្គាម៉ា-តូកូហ្វេរ៉ុល

មុខងារ ៖

វីតាមីនE គឺជាអង់ទីអុកស៊ីដង់ ដែលការពារជាលិការាងកាយ ពីការបំផ្លាញដែលបង្កដោយ សារធាតុហៅថា រ៉ាឌីកាល់សេរី។ រ៉ាឌីកាល់សេរីអាចបំផ្លាញកោសិកា ជាលិកា និងសរីរាង្គ ផ្សេងៗបាន។ រាឌីកាល់នេះត្រូវាបានគេជឿថាចូលរួមក្នុងស្ថានភាពមួយចំនួនដែលទាក់នឹង ភាពចាស់។

រាងកាយ ត្រូវការវីតាមីនE ដើម្បីជួយរក្សាប្រពន្ធ័ភាពស៊ាំ អោយរឹងមាំប្រឆាំង នឹងវីរុស និង បាក់តេរី។

វីតាមីនEក៏ចូលរួមយ៉ាងសំខាន់ផងដែរ ក្នុងការបង្កើតកោសិកាឈាមក្រហម និង ជួយអោយ រាងកាយប្រើប្រាស់វីតាមីនK។ វីតាមីននេះក៏ជួយ ពង្រីកសសៃឈាម និងរក្សាឈាមពីការកក

ស្ទះនៅក្នុងសសៃឈាម

កោសិកាប្រើប្រាស់ វីតាមីនE ដើម្បីទាក់ទងគ្នាទៅវិញទៅមក និងអនុវត្តនូវមុខងារសំខាន់ៗ ជា ច្រើន។

ថាតើវីតាមីនE អាចការពារ មហារីក ជំងឺបេះដូង ជំងឺបាត់បង់ការចងចាំ ជំងឺថ្លើម និងជំងឺដាច់ សសៃឈាមខួរក្បាល រឺក៏អត់ គឺមិនទាន់ត្រូវគេដឹងនៅឡើយទេ។

ប្រភពអាហារ

វិធីល្អបំផុតដើម្បីទទួលបានវីតាមីនEបានគ្រប់គ្រាន់ជាប្រចាំ គឺតាមរយៈការញ៉ាំប្រភពអាហារ នានា។ វីតាមីនEគឺត្រូវបានរកឃើញ នៅក្នុងអាហារដូចខាងក្រោម៖

·        ប្រេងបន្លែ(ដូចជា ពពួកស្រូវសាឡី ផ្កាឈូករត្ន័ ពោត និងប្រេងសណ្តែក)

·        ពពួកសណ្តែកដី(ដូចជា អាល់ម៉ុន សណ្តែកដី ហេសេលណាត់ និង ហ្វីលប៊ឺត)។

·        គ្រាប់ផ្លែឈើ (ដូចជាគ្រាប់ផ្កាឈូករត្ន័ជាដើម)

·        បន្លែដែលមានស្លឹកពណ៌បៃតង (ដូចជាស្ពៃ និង ស្ពៃក្តោបបៃតង)

·        អាហារពេលព្រឹកគ្រាប់ធញ្ញជាតិដែលមានសារធាតុចិញ្ចឹម ទឹកផ្លែឈើ ប៊័រផ្សំពីបន្លែ និង

ខ្លាញ់សត្វនិងគ្រឿងលាបនំបុ័ង។

ផលវិបាក

ការញ៉ាំវីតាមីនEដែលមាន ក្នុងអាហារ គឺមិនបង្កឲ្យមានគ្រោះថ្នាក់ រឺក៏ផលប៉ះពាល់អ្វីទេ។ បើ ប្រើជាសារធាតុបន្ថែមវិញ វីតាមីនEដូសខ្ពស់ អាចប្រឈមមុខនឹង ការហូរឈាមខួរក្បាលធ្ងន់ ធ្ងរ។

ដំបូន្មាន

ប្រពន្ធ័គណនាសារធាតុចិញ្ចឹម (RDA) សំរាប់វីតាមីន បង្ហាញពីចំនួនវីតាមីន ដែលមនុស្សភាគ ច្រើនត្រូវការជាប្រចាំថ្ងៃ។

·         RDA សំរាប់វីតាមីន ត្រូវបានប្រើប្រាស់ជាគោលដៅកំណត់ សំរាប់មនុស្ស ម្នាក់ៗ។

·         ចំនួនវីតាមីន ដែលអ្នកត្រូការគឺផ្អែកលើអាយុ និងភេទរបស់អ្នក។

·         កត្តាផ្សេងៗទៀតដូចជា ការមានផ្ទៃពោះ ការបំបៅដោះកូននិង ជំងឺក៏ជាកត្តា សំខាន់ ដែរ ក្នុងការបង្កើននូវចំនួនវីតាមីន ដែលអ្នកត្រូវការ។

ចំនួន វីតាមីនEដែលសមស្របគឺ៖

ទារក(ចំនួនសមល្មមនៃវីតាមីនE)

·         ០ - ៦៤ខែ= ៤ មីលីក្រាម/ថ

·         ៧ - ១២ខែ= ៥ មីលីក្រាម/ថ

កុមារ

·         ១ - ៣ឆ្នាំ=៦មីលីក្រាម/ថ

·         ៤ - ៨ឆ្នាំ= ៧មីលីក្រាម/ថ

·         ៩ - ១៣ឆ្នាំ= ១១មីលីក្រាម/ថ

ក្មេងជំទង់ និងមនុស្សពេញវ័យ

·         ១៤ឆ្នាំ រឺលើស= ១៥មីលីក្រាម/ថ

សាកសួរអ្នកផ្តល់ការថែទាំសុខភាពថាចំនួនប៉ុណ្ណាដែលសក្កិសមនឹងអ្នក។

កំរិតខ្ពស់បំផុតនៃវីតាមីនEបន្ថែម ដែលមានសុវត្ថិភាពសំរាប់មនុស្សពេញវ័យគឺ ១៥០០IU/ថ ក្នុង ទំរង់ធម្មជាតិនៃវីតាមីនE និង ១០០០IU/ថក្នុងទំរង់ដែលបង្កើតដោយមនុស្ស៕

អានលម្អិត

អត្ថប្រយោជន៍ទាំង៥ របស់អាស៊ីតខ្លាញ់ អូមេហ្គា ៣

Friday, December 14, 2012 ឳសថ

ពួកយើងដឹងហើយថា ស្ត្រីទាំងអស់ស្អប់នូវពាក្យថាខ្លាញ់ណាស់ នៅពេលណាដែលយើងលើកពីវា យកមកនិយាយនោះ ប៉ុន្តែអាស៊ីតខ្លាញ់ អូមេហ្គា ៣ ឬ Omega 3 Fatty Acids គឺមានភាពខុសគ្នា។ អ្នកនឹងមិន អាចដឹងបានពី អត្ថប្រយោជន៍របស់ពួកវា ក្នុងរយៈពេលខ្លីនោះទេ ប៉ុន្តែវាគឺពិតជាសំខាន់ ចំពោះកត្តា មេតាបូលីសនៅក្នុងរាងកាយ និង ជួយលើកស្ទួយដល់សុខភាព និង សុខមាលភាពរបស់ យើងម្នាក់ៗ ក្នុងរយៈពេលយូរក្រោយមកទៀត ។ អ្នកអាចបន្តអាច នូវចំណុចខាងក្រោមទាំងអស់នេះ ដើម្បីស្វែង យល់បានពីអត្ថប្រយោជន៍របស់ពួកវា ។

១. ប្រឆាំងនឹងជំងឺបាក់ទឹកចិត្ត

     តើអ្នកយល់យ៉ាងណាដែរ ចំពោះទន្សនៈដែលគិតថា ការទទួលទានអាហារអោយបានល្អ គឺអាច ប្រឆាំងនឹងជំងឺបាក់ទឹកបាន? ប្រសិនបើអ្នក បានសើចរួចទៅហើយ នោះអ្នកនឹងរីករាយក្នុងការដឹង ពី ផលប្រយោជន៍របស់ អាស៊ីតខ្លាញ់អូមេហ្គា ៣នេះ។ ការសិក្សាស្រាវជ្រាវបានបង្ហាញថា ក្រុមមនុស្សដែល បាន ទទួលទានអាហារដែលសម្បូរទៅដោយ អាស៊ីតខ្លាញ់អូមេហ្គា ៣ ជារៀងរាល់ថ្ងៃ ដូចជាពពួក សាច់ត្រី គឺហាក់នឹងមិនងាយរងគ្រោះ ពីសា្ថនភាពនៃជំងឺធ្លាក់ទឹកចិត្ត និង ភាពថប់បារម្ភនេះទេ។

២. ជួយជម្រុញដល់ប្រព័ន្ធភាពសុំា

   ការសិក្សាក៏បានបង្ហាញទៀតផងដែរថា អាស៊ីតខ្លាញ់អូមេហ្គា ៣ អាចនឹងជម្រុញដល់ ប្រព័ន្ធភាពសុំា នៅក្នុងខ្លួនរបស់អ្នកបាន។ ឬនិយាយម្យ៉ាងវិញទៀតថា វាអាចជួយអ្នក ក្នុងការ ការពាររាងកាយបានពី ពពួកជំងឺផ្សេងៗ រួមមានដូចជា ជំងឺអាល់ហ្សេមឺ ( Alzheimer’s disease) ។ អ្នកក៏អាចនឹង ធ្វើអោយ សុខភាពរបស់គ្រួសារអ្នកបានល្អបន្តិច ជាមួយនឹងការបង្កើននូវការទទួលទាន នូវអាស៊ីតខ្លាញ់អូមេហ្គា ៣ ទៅក្នុងរបបអាហារ របស់អ្នក ដើម្បីជួយទ្រទ្រង់ដល់ ប្រព័ន្ធការពារភាពសុំារបស់អ្នក ។

៣. ធ្វើអោយសុខភាពសសៃឈាមបេះដូង បានល្អប្រសើរឡើង

    មានការសិក្សាស្រាវជ្រាវផ្សេងទៀត បានបង្ហាញទៀតដែរថា អាស៊ីតខ្លាញ់អូមេហ្គា ៣ អាចកាត់បន្ថយ នូវឱកាសប្រឈមនឹងជំងឺ បេះដូង,ជំងឺដាច់សសៃឈាមក្នុងខួរក្បាល, បេះដូងឈប់ដើរ និង បញ្ហានៃ ជំងឺបេះដូងសសៃឈាមផ្សេងៗទៀត។ អត្ថប្រយោជន៍របស់វា អាចនឹងមិនបង្ហាញក្នុងពេលភ្លាមៗនោះទេ ប៉ុន្តែ វាអាចជាគន្លឹះសម្រាប់អ្នក ក្នុងការទទួលបាននូវសុខភាពនៃសសៃឈាមបេះដូងល្អ នៅក្នុង រយៈពេលក្រោយមកទៀត ។

៤. កាត់បន្ថយនូវការរលាក

     ការប្រើប្រាស់នូវ អាហារដែលមានផ្ទុកនូវ អាស៊ីតខ្លាញ់អូមេហ្គា៣ អាចនឹងជួយកាត់បន្ថយនូវការ រលាក ឬ ការបង្ករោគនៅក្នុងខ្លួនអ្នកបាន។ អត្ថប្រយោជន៍របស់វា គឺហាក់ដូចជាឱសថទិព្វ ដែលអាចនឹង ជួយ កាត់បន្ថយនូវរោគសញ្ញា នៃជំងឺរលាកសន្លាក់គន្លាក់ឆ្អឹង, ឈឺសន្លាក់ និងបញ្ហា នៃជំងឺរលាកសន្លាក់ ផ្សេងៗទៀត ។

៥. កាត់បន្ថយនូវ ឱកាសនៃការកើតមាននូវភាពមិនប្រក្រតីផ្នែកផ្លូវចិត្ត ចំពោះកុមារ

     នេះគឺអត្ថប្រយោជន៍មួយ របស់អាស៊ីតខ្លាញ់អូមេហ្គា៣ ពីព្រោះថាអ្នកគួរតែ រួមបញ្ចូលវា ទៅក្នុងទម្លាប់ អាហារជាប្រចាំថ្ងៃរបស់អ្នក។ ការសិក្សាបានបង្ហាញទៀតថា អាស៊ីតខ្លាញ់អូមេហ្គា ៣ អាចការពារ និង កាត់បន្ថយបាននូវ ការប្រឈមនឹងភាពមិនប្រក្រតីផ្នែកផ្លូវចិត្ត របស់កុមារ និង ថែមទាំង នៅក្នុងវ័យជំទង់ បានផងដែរ៕

អានលម្អិត

អត្ថប្រយោជន៍របស់ថ្នាំគ្រាប់វីតាមីន A ចំពោះរាងកាយ

Friday, December 14, 2012 ឳសថ

វីតាមីន A គឺពិតជាមានអត្ថប្រយោជន៍ នៅក្នុងរបបអាហារដែលធ្វើអោយ អ្នកមានសុខភាពល្អ។ វីតាមីនដែល មានសារៈសំខាន់ មានជាតិខ្លាញ់ និង អាចរលាយបាននេះ គឺជាប្រភេទវីតាមីនដំបូងគេ ដែលត្រូវបានគេដាក់ឈ្មោះ ជាផ្លូវការ ហេតុដូចនេះហើយទើបបានជាវា ត្រូវបានគេហៅថា វីតាមីន A។ ខ្លួនប្រាណរបស់អ្នក ត្រូវការ ការផ្គត់ ផ្គង់ជា ជាប់លាប់ នូវវីតាមីនប្រភេទនេះ ដើម្បីជួយរក្សាសុខភាពស្បែក, ការមើលឃើញអោយបានល្អប្រសើរ និង ការរីក ធំធាត់ចំពោះកុមារ។

    វីតាមីនA ត្រូវបានគេជឿថា វាគឺជាសារធាតុប្រឆាំងប្រតិកម្មអុកស៊ីត ចំពោះការ ការពារជំងឺមហារីក ហើយវាក៏ ធ្វើអោយប្រព័ន្ធភាពសុំា មានភាពសកម្មប្រសើរជាងមុន រួចវាក៏អាចជួយទប់ស្កាត់ ជំងឺផ្សេងៗដទៃទៀតផងដែរ។ បេតាការ៉ូតែន ( Beta-carotene) គឺមានម៉ូលេគុល វីតាមីនA ទ្វេគុណជាពីរ ហើយវា ត្រូវបានបំលែងជាវីតាមីន A វិញ នៅពេលដែលវា បានចូលទៅក្នុងខ្លួនរបស់មនុស្ស។ វាគឺជាសារធាតុដែលរលាយក្នុងទឹក។ ខ្លួនប្រាណអ្នកអាច កំចាត់ចោលនូវអ្វី ដែលវានឹងមិនត្រូវការប្រើប្រាស់ ដូច្នេះហើយទើប បានជាវាមិនសូវមានភាពពុល ជាងវីតាមីន A ដែល វាអាចនឹងកើតមានឡើង ។

ទាំងនេះគឺជា អត្ថប្រយោជន៍នៃការប្រើវីតាមីន A ៖

•    វាត្រូវបានគេ ប្រើសម្រាប់ការព្យាបាលការចំលងរោគស្រួចស្រាវ។
•    ធ្វើអោយការមើលឃើញ នៅក្នុងពេលយប់មានភាពប្រសើរឡើងជាងមុន។
•    ការពាររាងកាយ ពីឥទ្ធិពលរំខាន របស់កោសិកា ដែលមានមកពីសារធាតុគីមីជាច្រើន ដែលមានជាតិពុល។ ការសិក្សាស្រាវជ្រាវ បានបង្ហាញថា បេតាការ៉ូតែន គឺមានសកម្មភាពប្រឆាំងប្រតិកម្មអុកស៊ីតបានយ៉ាង ខ្លាំងក្លា និង វាអាចជួយការពារអ្នក ពីការវិវត្តន៍មាននូវជំងឺមហារីកមួយចំនួន ជាពិសេសនោះ គឺជំងឺ មហារីកសួត និង ជំងឺមហារីកស្បែក។

ប្រសិនបើអ្នកធ្វើការជក់បារី ឬ មានការប្រឈមទៅនឹងពន្លឺព្រះអាទិត្យ វីតាមីនA ឬ បេការ៉ូតែន គឺជាសារធាតុ បន្ថែមដ៏ល្អប្រសើរបំផុត ក្នុងការបញ្ចូលទៅក្នុងកម្មវិធី នៃការទទួលនូវសារធាតុបន្ថែមជាប្រចាំថ្ងៃរបស់អ្នក។

វីតាមីន A ត្រូវបានគេឃើញមានជាលក្ខណៈធម្មជាតិ នៅក្នុងផ្លែក្រូច និង ផ្លែឈើ និង បន្លែដែលមានពណ៌ លឿង មានដូចជា ស្ពីណាច ក៏ដូចជា បេតាការ៉ូតែន ដែលមាននៅក្នុង ខ្លាញ់សត្វ ដូចជា ស្នូលពណ៌លឿងរបស់ ស៊ុត ដែលនោះគឺពិតជា ប្រភពពិតនៃវីតាមីន A។ វាក៏ត្រូវបានគេហៅម្យ៉ាងទៀតផងដែរថា រ៉េទីណុល (retinol) ដោយសារតែអត្ថប្រយោជន៍ ដ៏មានប្រសិទ្ធភាពរបស់វាចំពោះការមើលឃើញ។
ការទទួលទាននូវសារជាតិវីតាមីន A ជាប្រចាំថ្ងៃត្រូវបានគេណែនាំ អោយនៅចន្លោះពី ៣០០០ ទៅ ១០.០០០ IU គឺវាអាស្រ័យទៅលើ អាយុ និង ស្ថានភាពសុខភាពរបស់អ្នក ខណៈពេលដែលការទទួលទាននូវ បេការ៉ូតែន ក្នុងកម្រិតសុវត្ថិភាពនោះគឺ ពី ១០.០០០ ទៅ ៥០.០០០ IU ។

កង្វះសារជាតិវីតាមីន A នឹងផ្តល់ផលអាក្រក់ដល់ សុខភាពស្បែក, មុខងាររបស់ប្រព័ន្ធភាពសុំា និង ចក្ខុវិស័យ។ ឥទ្ធិពលនូវការពុលនៃ វីតាមីន A នឹងកើតមាននៅពេលដែលអ្នកបានលេបវា ក្នុងបរិមាណច្រើន ជ្រុលក្នុងរយៈកាលកំណត់ណាមួយ។ រីឯផលរំខានរបស់ បេតាការ៉ូតែន គឺមានតែការធ្វើអោយស្បែករបស់អ្នក មានពណ៌លឿង ឬ ពណ៌ទឹកក្រូចតែប៉ុណ្ណោះ ៕

អត្ថបទនេះត្រួតពិនិត្យដោយវេជ្ជ.ងួន សេរ័ត្ន

អានលម្អិត

យល់ដឹងអំពីការប្រើថ្នាំTetracycline

Friday, December 14, 2012 ឳសថ

សម្រាប់ការព្យាបាល នូវប្រភេទជាទូទៅបំផុត នៃការបង្ករោគដែលបណ្តាលមកពី ពពួកបាក់តេរី នោះកម្រិតដូសនៃថ្នាំ តេត្រាស៊ីគ្លីន ដែលត្រូវបានណែនាំគឺ ២៥០មីលីក្រាម ឬ ៥០០មីលីក្រាម ៤ដង ជារៀងរាល់ថ្ងៃ ក្នុងរយៈពេលពី ៧ ទៅ ១៤ថ្ងៃ ។ កម្រិតដូស នៃថ្នាំតេត្រាស៊ីគ្លីន ដែលត្រូវបានណែនាំ ចំពោះ ការព្យាបាល ជំងឺមុនដែលមានសភាពពី មធ្យម ដល់ ធ្ងន់ធ្ងរគឺ ចាប់ពី ១២៥មីលីក្រាម ទៅ ៥០០ មីលីក្រាម ២ដងជារៀងរាល់ថ្ងៃ ។ សម្រាប់ការសម្លាប់នូវមេរោគ ពពួក Helicobacter pylori កម្រិតដូស នៃថ្នាំ តេត្រាស៊ីគ្លីន គឺ ៥០០មីលីក្រាម២ ទៅ៤ដង ជារៀងរាល់ថ្ងៃ គឺអាស្រ័យទៅតាម រយៈពេល ដែល ត្រូវបានប្រើប្រាស់។ កត្តាអាយុ និង ស្ថានភាពផ្នែកវេជ្ជសាស្ត្រផ្សេងទៀត របស់អ្នកជំងឺ អាចនឹងជះ ឥទ្ធិពលទៅដល់ កម្រិតដូសនៃថ្នាំតេត្រាស៊ីគ្លីន ដែលពួកគេត្រូវប្រើ ។ វេជ្ជបញ្ជានឹងត្រូវចេញ ទៅកាន់អ្នកជំងឺខុសៗគ្នា ដោយអាស្រ័យទៅតាមកត្តាមួយចំនួន ដូចខាងក្រោម នេះ ៖ · ស្ថានភាពផ្នែកវេជ្ជសាស្ត្រ ដែលអ្នកកំពុងតែត្រូវបានទទួល នូវការព្យាបាល។ · អាយុរបស់អ្នក។ · តើអ្នកមានមុខងារតម្រងនោមថយចុះដែរឬទេ? · ស្ថានភាពផ្នែកវេជ្ជសាស្ត្រផ្សេងទៀត ដែលអ្នកអាចមាន។ · ប្រភេទឱសថផ្សេងទៀត ដែលអ្នកអាចនឹងកំពុងតែបន្តប្រើប្រាស់។ អ្នកត្រូវតែធ្វើតាមការណែនាំរបស់គ្រូពេទ្យ ឬ ឱសថការី អំពីការប្រើប្រាស់ថ្នាំ ហើយអ្នកមិនត្រូវធ្វើការ កែប្រែកម្រិតវា នោះទេ ដរាបណា អ្នកជំនាញផ្នែកវេជ្ជសាស្ត្របានណែនាំអ្នក អោយធ្វើដូចនោះ ។ កម្រិតដូសតេត្រាស៊ីគ្លីន សម្រាប់ព្យាបាលការបង្ករោគដោយសារពពួកបាក់តេរី កម្រិតដូសនៃថ្នាំតេត្រាស៊ីគ្លីន ដែលត្រូវបានណែនាំ សម្រាប់ការបង្ករោគជាទូទៅ ដែលបង្កោដោយ ពពួកបាក់តេរី គឺ តេត្រាស៊ីគ្លីន ២៥០មីលីក្រាម ឬ ៥០០មីលីក្រាម លេប ៤ដង ជារៀងរាល់ថ្ងៃ ប្រើ ក្នុង រយៈពេលពី ៧ ទៅ ១៤ថ្ងៃ ។ សម្រាប់ការបង្ករោគ ដេលមានសភាពរុំាំរ៉ៃ ឬ ធ្ងន់ធ្ងរជាងនេះ នោះអ្នកផ្តល់ សេវាថែទាំសុខភាពរបស់អ្នក នឹងអាចបន្តនូវរយៈពេលនៃការព្យាបាលនេះ បន្ថែមទៀត។ សម្រាប់កុមារ ដែលមានអាយុ ៨ឆ្នាំ ឬ ច្រើនជាងនេះ កម្រិតដូសនៃថ្នាំនេះ អាចមានកម្រិតចាប់ពី ( គឺអាស្រ័យទៅតាម ទម្ងន់រាងកាយ) ២៥ ទៅ ៥០មីលីក្រាម ក្នុងទម្ងន់រាងកាយ ១គីឡូក្រាម ( មីលីក្រាម / គីឡូក្រាម/ ថ្ងៃ ) ហើយវាត្រូវបានបែងចែកជា ៤ដង ប្រចាំថ្ងៃ និង ប្រើសម្រាប់រយៈពេលពី ៧ ទៅ ១៤ថ្ងៃ ។ កម្រិតដូសនៃថ្នាំតេត្រាស៊ីគ្លីន សម្រាប់ព្យាបាលជំងឺមុន កម្រិតដូសនៃការណែនាំ នៃការប្រើថ្នាំតេត្រាស៊ីគ្លីន សម្រាប់ព្យាបាលជំងឺមុន ដែលមានសភាពចាប់ពី មធ្យម រហូតដល់ សភាពធ្ងន់ធ្ងរ គឺ ១២៥មីលីក្រាម ទៅ ៥០០មីលីក្រាម ប្រើវា ២ដង ជារៀងរាល់ថ្ងៃ ។ សម្រាប់ការព្យាបាលជំងឺមុន រយៈពេលនៃការព្យាបាលដោយប្រើថ្នាំនេះ គួរត្រូវបានបន្ត អោយបានយ៉ាង ហោចណាស់ ១២សប្តាហ៍ ដើម្បីទទួលបានលទ្ធផលពេញលេញ ៕ អត្ថបទនេះត្រួតពិនិត្យដោយវេជ្ជ.ងួន សេរ័ត្ន

អានលម្អិត

តើវាប៉ះពាល់ទេប្រសិនបើយើងប្រើវីតាមីន C ច្រើនពេក?

Friday, December 14, 2012 ឳសថ

វីតាមីន C គឺជាសារធាតុចិញ្ចឹមសំខាន់។ វីតាមីន C គឺជាវីតាមីនដែលរលាយក្នុងទឹកដែលគាំទ្រដល់ការលូតលាស់ និងការរីកចម្រើនធម្មតា។ វីតាមីន C ក៏ជួយខ្លួនរបស់អ្នកអោយស្រូបជាតិដែកផងដែរ។ ដោយសារតែខ្លួនរបស់អ្នកមិនផលិត ឬស្តុកវីតាមីន C, ដូចនេះវាជារឿងសំខាន់ដើម្បីរាប់បញ្ចូលវីតាមីន C នៅក្នុងអាហាររបស់អ្នក។ ចំពោះមនុស្សភាគច្រើន, ផ្លែក្រូចធំមួយផ្លែក៏ផ្តល់នូវវីតាមីន C បានគ្រប់គ្រាន់ផងដែរក្នុងមួយថ្ងៃ។ វីតាមីន C នៅសល់នឹងត្រូវបានបញ្ចេញពីខ្លួនតាមទឹកនោមរបស់អ្នក។
ចំពោះមនុស្សពេញវ័យ, ការណែនាំខាងចំណីអាហារបានបង្ហាញថា សូមទទួលទានវីតាមីន C ពី៦៥ ទៅ៩០មីលីក្រាមក្នុងមួយថ្ងៃ ហើយកម្រិតខ្ពស់បំផុតគឺ២.០០០មីលីក្រាមក្នុងមួយថ្ងៃ។ បើទោះជាអ្នកធ្វើការទទួលទានជាតិវីតាមីន C ច្រើនពេកក៏ដោយប៉ុន្តែវាហាក់ដូចជាមិនធ្វើអោយប៉ះពាល់នោះឡើយ។ កម្រិតខ្ពស់នៃវីតាមីន C អាចបណ្តាលអោយ៖
-          រាគ
-           ចង្អោរ
-           ក្អួត
-           ក្រហាយទ្រូង
-           ហើមពោះ និងរមួលពោះ
-           ឈឺក្បាល
-           គេងមិនលក់
-           គ្រួសក្នុងតម្រងនោម
សូមចាំថា, ចំពោះមនុស្សភាគច្រើន, ចំណីអាហារដែលផ្តល់នូវសុខភាពគឺជាការមានកម្រិតវីតាមីន C បានគ្រប់គ្រាន់៕

អត្ថបទត្រួតពិនិត្យដោយវេជ្ជ.ងួន សេរ័ត្ន

អានលម្អិត

សុខភាពថ្ងៃនេះ

Thursday, February 21, 2013

អ្វីទៅជា ថ្នាំ Diane 35 ?

Thursday, January 10, 2013

ដំបូន្មាន១០យ៉ាងក្នុងការប្រើប្រាស់ឱសថដោយខ្លួនឯង

Saturday, January 5, 2013

របៀបប្រើប្រាស់ម្រុំជាឳសថ

Friday, January 4, 2013

ប្រការគ្រោះថ្នាក់នៅពេលកិនថ្នាំគ្រាប់ និងដោះសម្បកថ្នាំចេញ

Tuesday, January 1, 2013

ឱសថផលិតពីពិសរបស់ខ្ទួយ ព្យាបាលបាន រោគមហារីក៥

Tuesday, December 25, 2012

ថ្នាំងងុយគេងអាចបង្កើនហានិភ័យជំងឺរលាកសួត

Friday, December 14, 2012

វីតាមីន B9: អ្វីដែលស្ត្រីគួរយកចិត្តទុកដាក់់សម្រាប់ផ្ទៃពោះ

ផលរំខាន នៃការប្រើប្រាស់ថ្នាំគ្រាប់ ម៉ុលទីវីតាមីន (Multivitamin )

វីតាមីន B3 :អ្វីដែលអ្នកត្រូវដឹងដើម្បីសុខភាព

វីតាមីនE:ប្រើច្រើនហួសអាចនាំអោយហូរឈាមក្នុងខួរក្បាលធ្ងន់ធ្ងរ

អត្ថប្រយោជន៍ទាំង៥ របស់អាស៊ីតខ្លាញ់ អូមេហ្គា ៣

អត្ថប្រយោជន៍របស់ថ្នាំគ្រាប់វីតាមីន A ចំពោះរាងកាយ

យល់ដឹងអំពីការប្រើថ្នាំTetracycline

តើវាប៉ះពាល់ទេប្រសិនបើយើងប្រើវីតាមីន C ច្រើនពេក?

អត្ថបទអានច្រើនបំផុត

ក្រុមអត្ថបទ

ចំណាត់ក្រុមអត្ថបទ

អត្ថបទតាមខែ

ភ្ញៀវចូលទស្សនា

មន្ទីរពេទ្យគន្ធបុបា្ផ

Thursday, February 21, 2013

Thursday, January 10, 2013

Saturday, January 5, 2013

Friday, January 4, 2013

Tuesday, January 1, 2013

Tuesday, December 25, 2012

Friday, December 14, 2012

ទំនាក់ទំនងយើងខ្ញុំតាម

អត្ថបទអានច្រើនបំផុត

ក្រុមអត្ថបទ

ចំណាត់ក្រុមអត្ថបទ

អត្ថបទតាមខែ

ភ្ញៀវចូលទស្សនា

មន្ទីរពេទ្យគន្ធបុបា្ផ