ក្នុង១ឆ្នាំៗមានមនុស្សរាប់លាននាក់ឆ្លងជំងឺដោយសារចំណីអាហារមិនធានាអនាម័យ ។ ខាងក្រោមនេះជាបាក់តេរីសំខាន់ៗ៧ប្រភេទឆ្លងតាមចំណីអាហារ និងវីធីបង្ការ ។
- E.Coli : ជាបាក់តេរីរស់នៅក្នុងពោះវៀនដូចជាគោ ចៀម ពពែ ។ ពួកវាច្រើនត្រូវបានរកឃើញនៅក្នុងអាហារដូចជាសាច់គោពុំទាន់ចម្អិនឆ្អិន ទឹកដោះគោស្រស់ពុំទាន់សម្លាប់មេរោគ ប្រភពទឹកកខ្វក់ ។ E.coli បង្កការឆ្លងតាមផ្លូវពោះវៀន រោគសញ្ញាទាំងឡាយរួមមាន : រាករូសធ្ងន់ ឈឺពោះ ក្អួតចង្អោរអូសបន្លាយ ។
ដើម្បីបញ្ចៀសត្រូវឆ្លងបាក់តេរី E.coli ចូរ"ទទួលទានឆ្អិន ផឹកទឹកពុះ" លាងផ្លែឈើ និងបន្លែមុនពេលទទួលទាន ឬចម្អិន ។ មិនទទួលទានផ្លែឈើ ឬទឹកដោះគោពុំទា់បានសម្លាប់មេរោគ ។
- Compylobacterjejuni : ជាបាក់តេរីរាងគូទខ្យង រីកចម្រើនសំខាន់នៅសត្វមាន់ និងគោ ។ សឹងតែទាំងអស់នៃអ្នកឆ្លងបាក់តេរីនេះច្រើនមានរោគសញ្ញារាគរូស រមួលក្រពើ ឈឺក្រពះ និងគ្រុនក្តៅពី២-៥ថ្ងៃ ។
ដើម្បីទប់ស្កាត់បាក់តេរីប្រភេទនេះ អង្គការសុខភាពពិភពលោក(WHO) ទូន្មានថា សាច់ត្រូវចម្អិនឲ្យបានឆ្អិនល្អ លាងដៃក្រោយពេលប៉ះពាល់អាហារឆៅ និងសំអាតឧបករណ៍ផ្ទះបាយទាំងអស់ក្រោយពេលប្រើប្រាស់ ទទួលទានតែទឹកដោះគោបានសម្លាប់មេរោគ ។
- Listeria monocgtogenes : ជាបាក់តេរីត្រូវបានរកឃើញក្នុងដី និងទឹក ហើយវាក៏មានវត្តមានក្នុងអាហារស្រស់ឆៅក៏ដូចក្នុងអាហារបានកែច្នៃ និងទឹកដោះគោពុំទាន់បានសម្លាប់មេរោគ ។ មិនដូចជាពពួកបាក់តេរីផ្សេងៗ Listeria អាចរីកចម្រើន និងរាលដាលសូម្បីតែក្នុងសីតុណ្ហភាពត្រជាក់មធ្យមរបស់ទូទឹកកក ។ រោគសញ្ញារបស់ការឆ្លង Listeria រួមមាន គ្រុនក្តៅ និងរងា ឈឺក្បាល ឈឺពោះ និងក្អួតចង្អោរ ។ ចំពោះមនុស្សមួយចំនួន ជំងឺអាចប្រែជាធ្ងន់ធ្ងរជាង ហើយថែមទាំងអាចបណ្តាលឲ្យបាត់បង់ជីវិត ។
ដើម្បីបង្ការជំងឺចាំបាច់ត្រូវអនុវត្តវិធានការទាំងឡាយដូចជា ធានាអនាម័យសុវត្ថិភាពអាហារនៅបណ្តាផ្នែក កែច្នៃ ដឹកជញ្ជូន បែងចែក ប្រើប្រាស់សាច់ស្រស់ ទឹកដោះគោស្រស់ និងផលិតផលទឹកដោះគោ ស៊ុត ពពួកបន្លែផ្លែឈើស្រស់ ។ ទទួលទានអាហារឆ្អិន ទឹកឆ្អិន លាងដៃស្អាតមុននឹងក្រោយពេលបន្ទោរបង់ ។ រក្សាអនាម័យឧបករណ៍កែច្នៃ ដាក់និងទូរទឹកកក ដាក់ដោយឡែកអាហារឆៅ និងឆ្អិន អាហារចាស់ និងថ្មី ថែទាំអាហារនៅសីតុណ្ហភាពសុវត្ថិភាព ។
- Vibrio Parahae moly licus : ជាបាក់តេរីរស់នៅក្នុងទឹកប្រៃ ច្រើនត្រូវបានរកឃើញនៅក្នុងគ្រឿងសមុទ្រឆៅ ។ ពួកអ្នកទទួលទានងាវ ខ្យងឆៅ ឬចម្អិនពុំទាន់ឆ្អិន តែងត្រូវឆ្លងបាក់តេរីនេះ ក្នុងរង្វង់២៤ម៉ោង បង្កជារោគសញ្ញាដូចជា រាករូស ជាមួយនឹងការកន្ត្រាក់ក្រពះ ចង់ក្អួតចង្អោរ និងស្រៀវស្រាញ ។
អាចទប់ស្កាត់ដាច់ខាតជំងឺឆ្លងបាក់តេរីនេះ ដោយវិធីចម្អិនឆ្អិនត្រឹមត្រូវពពួកអាហារសមុទ្រ ។
- អតិសុខុមប្រាណ Toxoplasma gondii : ពុំត្រឹមតែជ្រកពួននៅលើសត្វឆ្មាប៉ុណ្ណោះទេ តែវានៅអាចរស់នៅលើពពួកសត្វឈាមក្តៅគ្រប់ប្រភេទ ។ មនុស្សអាចត្រូវឆ្លងកាត់អតិសុខុមប្រាណ T gondii ពេលប៉ះពាល់លាមកឆ្មា ឬទទួលទានសាច់ចម្អិនពុំទាន់ឆ្អិនល្អ បន្លែពុះទាន់លាង ។ ការស្រាវជ្រាវមួយចំនួនបង្ហាញថា អតិសុខុមប្រាណនេះពាក់ព័ន្ធដល់បញ្ហាសុខភាពយ៉ាងច្រើនដូចជាជំងឺសរសៃប្រសាទ និងមហារីកខួរក្បាល ។
ដើម្បីទប់ស្កាត់ CDC ទូន្មាន ត្រូវចំអិនអាហារនៅសីតុណ្ហភាពសុវត្តិភាព លាងដៃពេលប៉ះពាល់អាហារ ចៀសវាងទទួលទានអាហារមិនធានាអនាម័យ ហើយពិសេសស្ត្រីមានគភ៌ត្រូវចៀសវាងឲ្យឆ្ងាយពីសត្វឆ្មា ។
- Salmonella : ជាក្រុមបាក់តេរីមួយច្រើនត្រូវបានរកឃើញក្នុងសាច់បសុសត្វឆៅ ស៊ុត សាច់គោ និងលើផ្លែឈើ និងបន្លែពុំទាន់បានលាងសំអាត ។ បាក់តេរី Salmonella បង្កជារោគសញ្ញាដូចជាគ្រុនក្តៅ ឈឺពោះ រាករូស ឈឺក្រពះ និងឈឺក្បាលអូសបន្លាយពី៤-៧ថ្ងៃ ។ ប្រសិនមិនបានព្យាបាលត្រឹមត្រុវ វាអាចឆ្លងរាលដាលតាមរយៈឈាមទៅដល់បណ្តាផ្នែកផ្សេងៗ និងថែមទាំងអាចបណ្តាលឲ្យបាត់បង់ជីវិត ។
ដើម្បីទប់ស្កាត់ឆ្លងបាក់តេរី មិនត្រូវទទួលទានស៊ុតឆៅ ឬសាច់ចម្អិនពុំទាន់ឆ្អិន ។ ពពួកសាច់ឆៅត្រូវថែទាំដោយឡែក ។ ឧបករណ៍ផ្ទះបាយត្រូវលាងឲ្យស្អាតបាតក្រោយពេលកែច្នៃអាហារឆៅ ។
- Norovirus : ជាឈ្មោះរបស់ក្រុមវីរុសមួយ ច្រើនបង្កជំងឺរលាកផ្លូវពោះវៀន ដោយសារវីរុស(ផ្តាសាយក្រពះ) ។ បាក់តេរីនេះតែត្រូវបានរកឃើញនៅក្នុងអាហារ ឬភេសជ្ជៈកខ្វក់ ។ រោគសញ្ញាឆ្លងវីរុសរួមមានចង់ក្អួត ឈឺពោះ ក្អួតចង្អោរ រាករូស ឈឺក្បាល គ្រុនក្តៅ និងអស់កម្លាំង និងមាននិន្នាការអូសបន្លាយរយៈពេលប៉ុន្មានថ្ងៃ ។
ដើម្បីទប់ស្កាត់ norovirus ត្រូវលាងដៃដោយសាប៊ូ និងទឹកជាប្រចាំ ទទួលទានអាហារស្អាត សុវត្ថិភាព សម្លាប់មេរោគឧបករណ៍ផ្ទះបាយ និងបន្ទប់ទឹករាល់ថ្ងៃ ៕
(ប្រភព៖
Ksn-News.com)
