ក្រុមអ្នកវិទ្យាសាស្ត្រឥណ្ឌា ទទួលបានជោគជ័យ ក្នុងបន្ទប់ពិសោធន៍រារាំងកំណើនរបស់មូស ដោយប្រើប្រាស់សារធាតុចម្រុះ Nano Carbon បែបសាមញ្ញ ស្និទ្ធស្នាលនឹងបរិស្ថាន ហើយងាយផលិត ។ នេះជាដំណោះស្រាយឆ្លើយតបនឹងសំណួរពីការរារាំងមូស បង្កជំងឺរាតត្បាត -មូលហេតុនាំឲ្យមានការសម្លាប់របស់មនុស្សជិត ២ លាននាក់ លើពិភពលោក ក្នុង១ឆ្នាំៗ ។
 |
| មូសទម្លាក់ពង ក្នុងទឹកថ្លុក ហើយកើតជាដង្ហូវទឹក |
អាស្រ័យសមត្ថភាពសម្របខ្លួនល្អ អម្បូរមូស អាចរស់នៅបានស្ទើរតែគ្រប់លក្ខខណ្ឌបរិស្ថាន លើកលែងតែតំបន់ដ៏សែនត្រជាក់ ។ មូសពុំត្រឹមតែជាប្រភេទសត្វល្អិត បង្កភាពមួម៉ៅប៉ុណ្ណោះទេ ថែមទាំងជាកក្តាចម្លងជំងឺគ្រោះថ្នាក់ច្រើនយ៉ាង ជាអារិ៍ៈ គ្រុនចាញ់, គ្រុនឈាម , រលាកស្រោមខួរ... ។
កន្លងមក មានដំណោះស្រាយទប់ស្កាត់ការកកើតរបស់មូសជាច្រើន ត្រូវបានប្រើប្រាស់ដូចជាកាត់បន្ថយថ្លុកទឹក ជាកន្លែងវាពង បញ្ជូនពពួកឯកទេស “សម្លាប់” មូស ដូចជាកន្ទុំរុយ នៅក្នុងជីវចម្រុះ... ប៉ុន្តែ វាហាក់ដូចជាពុំបានផលច្រើន ហើយពុំទាន់ជាវិធីសាស្ត្រល្អបំផុតទេ ។
សាស្ត្រាចារ្យ Sabyasachi Sarkar រួមជាមួយបណ្តាអ្នកវិទ្យាសាស្ត្រអសរីរាង្គ (inorganic) គីមី របស់សាកលវិទ្យាល័យ វិទ្យាសាស្ត្របច្ចេកទេស Bengal ប្រទេសឥណ្ឌា ដោយចៃដន្យ បានរកឃើញបំណកស្រាយខុសប្លែកគេមួយ ។ ពួកកេមានបំណងថតយករូបពួកត្រី Zebrafish បន្ទាប់ពីពួកវាស៊ីមូស អ្នកវិទ្យាសាស្ត្របានប្រើសូលុយស្យុងគ្រាប់ Carbon nano (Ws CNPs) ទៅលើមូស ។ ការសង្កេតមើលបន្ទាប់មក បង្ហាញថា សូលុយស្យុង Ws CNPs បានពន្យឺតការលូតលាស់របស់ដង្កូវទឹក ។
បន្ទាប់ពីសិក្សាហ្មត់ចត់ជាងនោះ សាស្ត្រាចារ្យ Sarkar និងសហការី បានបញ្ជាក់ថា ក្នុងកំរិត ៣ មីលីក្រាម Ws CNPs សម្រាប់ទឹក១លីត្រ នោះដង្កូវទឹកពុំអាចលូតលាស់ ក្លាយជាមូលបាន ហើយត្រូវសម្លាប់ចោលអស់ ។ នៅក្នុងកំរិតដដែលនោះដែរ សុលុយស្យុង Ws CNPs ពុំឥទ្ធិពលអ្វីដល់បរិស្ថានទេ ។ លើសពីនេះទៀត Ws CNPs អាចស្ថិតស្ថេរក្នុងទឹកថ្លុកបាន អំឡុងពេលច្រើនខែ ដែលខុសប្លែកពីថ្នាំសម្លាប់សត្វល្អិតដទៃទៀត ។
ប្រភេទគ្រាប់ Nano Carbon នេះ អាចផលិតបានតាមរយៈដុតអាចម៌រណារ ក្នុងបរិស្ថាន មានអុកស៊ីហ្សែនតិចតួច លាងឲ្យស្អាតរួចបន្ថែមអាស៊ីដនីទ្រីកចូល ។ សាស្ត្រាចារ្យ Sarkar ផ្តើមសំណើថាៈ នេះជាដំណើរការមួយងាយស្រួល បើកទូលាយ ។ កម្មវិធីសម្លាប់មូសរបស់រដ្ឋាភិបាលបណ្តាប្រទេស គួរពិសោធន៍វិធីសាស្ត្រនេះ ពិសេសនៅកន្លែងដែលប្រព័ន្ធរំដោះទឹកពុំប្រព្រឹត្តទៅបានល្អ ៕
ប្រភព៖ ខ្មែរស្ថាបនា
