ស្វែងយល់ពីជំងឺទឹកដក់ក្នុងភ្នែកនិងវិធីព្យាបាល ~ សុខភាពថ្ងៃនេះ

ជួបជាមួយលោកវេជ្ជបណ្ឌិតងី ម៉េង ប្រធានកម្មវិធីជាតិសុខភាពភ្នែក បានមានប្រសាសន៍ឱ្យដឹងថា ជំងឺទឹកដក់ក្នុងភ្នែកគឺជាជំងឺដែលបំផ្លាញសរសៃប្រសាទភ្នែក បង្កឡើងពីមូលហេតុច្រើន ហើយសម្ពាធទឹកក្នុងភ្នែកឡើងខ្ពស់ គឺជាមូលហេតុសំខាន់ម្យ៉ាងទៀតដែលធ្វើឱ្យធ្លាខ្សែភ្នែកខូច ឬរួមតូចបន្តិចម្តងៗ ។ ជំងឺភាគច្រើនកើតចំពោះអ្នកដែលមានអាយុលើសពី៤០ឆ្នាំឡើងទៅ តែក៏មានជួបលើអ្នកដែលមានអាយុទាបជាងនេះដែរ ឬកើតមកតាំងពីកំណើតក៏មានដោយរមែងកើតលើភ្នែកទាំងសងខាង ។

មនុស្សយើងមានទឹកនៅផ្នែកក្នុងគ្រាប់ភ្នែក ស្រាប់ ទឹកនេះត្រូវបានបង្កើតឡើងក្នុងគ្រាប់ភ្នែក ហើយល្បាយចេញមកផ្នែកខាងក្រៅគ្រាប់ភ្នែក ។ ការបង្កើត និងការល្បាយចេញមកនេះត្រូវតែសមាមាត្រគ្នា ទើបជាសំពាធទឹកក្នុងភ្នែកដែលធម្មតា ។ បើវាមិនសមាមាត្រគ្នាដូចជាការបង្កើតទឹកច្រើនជាងធម្មតា ឬការល្បាយចេញមកតិចជាងធម្មតានឹងធ្វើឱ្យសំពាធទឹកក្នុងភ្នែកឡើង ខ្ពស់ ។ មូលេហតុភាគច្រើនកើតពីការហូរចេញរបស់ទឹកភ្នែកតិចជាងធម្មតា និងបណ្តាលឱ្យកកស្ទះទឹកនៅផ្នែកខាងក្នុងគ្រាប់ភ្នែក ហើយភ្នែកនឹងរឹងដូចថ្មដែលគេហៅថា «ជំងឺទឹកដក់ក្នុងភ្នែក» ។

សំពាធទឹកក្នុងភ្នែកធម្មតានៅចន្លោះ៩ទៅ២១mmHg ចំណែកសំពាធទឹកខុសធម្មតានឹងទៅសង្កត់សរសៃប្រសាទភ្នែកដែលនៅ ផ្នែកក្រោមរបស់គ្រាប់ភ្នែក ធ្វើឱ្យសរសៃប្រសាទភ្នែកអន់ថយ ហើយទៅមុខវានឹងធ្វើឱ្យភ្នែកស្រវាំង បើទុកចោលមិនបានទទួលការព្យាបាលភ្នែកនឹងពិការនៅទីបញ្ចប់ ។ ទោះបីអ្នកជំងឺបានទទួលការព្យាបាលរហូតសម្ពាធទឹកភ្នែកថយចុះមក ដូចធម្មតា តែខ្សែភ្នែកដែលខូចទៅហើយដោយជំងឺទឹកដក់នេះក៏មិនអាចត្រឡប់មក ល្អដូចដើមបានទេ ហេតុនេះហើយទើបគេចាត់ទុកជំងឺទឹកដក់ជាជំងឺមួយប្រភេទធ្ងន់ ណាស់ ។

ជំងឺទឹកដក់មានបីប្រភេទគឺ៖
១-ជំងឺទឹកដក់ប្រភេទបន្ទាន់ធ្ងន់AACG ៈ
កើត មកពីសម្ពាធទឹកក្នុងភ្នែកដែលឡើងខ្ពស់មួយរំពេចធ្វើឱ្យអ្នកជំងឺ មានអាការឈឺភ្នែកខ្លាំង ឈឺក្បាល ភ្នែកស្រវាំងយ៉ាងលឿនបំផុតអាចមានអាការចង់ក្អួតចង្អោររួមផងដែរ ។ ប្រសិនមិនទទួលការព្យាបាលអាការនេះនឹងកើនខ្លាំងឡើងជាលំដាប់ ។ ភាគច្រើនកើតចំពោះក្រុមមនុស្សមានអាយុចាប់ពី៤៥ឆ្នាំឡើងទៅ ។

២-ជំងឺទឹកដក់ប្រភេទមុំបិទ CACG ៈ
ជំងឺ ទឹកដក់ប្រភេទនេះមិនមានអាការអ្វីទេ តែជំងឺវិវឌ្ឍទៅម្តងបន្តិចៗ ហើយមុំប្រស្រីភ្នែកបិទ សម្ពាធទឹកក្នុងភ្នែកនឹងឡើងខ្ពស់ទៅៗ បើគេពិនិត្យទៅលើទងសរសៃប្រសាទភ្នែកនឹងឃើញថា ទងសរសៃប្រសាទភ្នែកខូងបណ្តាលមកពីជំងឺទឹកដក់ ហើយទីធ្លាភ្នែករួមតូច ។

៣-ជំងឺទឹកដក់ប្រភេទមុំបើក POAG ៈ
ជំងឺ នឹងវិវឌ្ឍយឺតៗ សម្ពាធក្នុងទឹកភ្នែកឡើងបន្តិចម្តងៗ ទើបមិនមានអាការឈឺចាប់រមែងកើតចំពោះភ្នែកទាំងសងខាង ។ រយៈពេលដំបូងមិនមានអាការខុសធម្មតាទេ ដល់ពេលជំងឺវិវឌ្ឍខ្លាំងទៅសរសៃប្រសាទ ភ្នែកត្រូវបំផ្លាញជារឿយៗ ធ្វើឱ្យគំហើញកាន់រួមតូច ពេលនោះទើបអ្នកជំងឺចាប់ផ្តើមដឹង បើសិនទៅជួបគ្រូពេទ្យយឺតពេលភ្នែកអាចពិការបាន ។

ដូច្នេះអ្នកដែលមានអាយុលើសពី៤០ឆ្នាំឡើងទៅ គួរតែទទួលការពិនិត្យភ្នែក និងវាស់សម្ពាធទឹកក្នុងភ្នែកពីគ្រូពេទ្យដើម្បីនឹងអាចដឹងមុនពី ជំងឺនេះមុនពេលវាធ្ងន់ ។ ជាពិសេសអ្នកជាសាច់ញាតិគ្រួសារអ្នកជំងឺទឹកដក់នឹងមានឱកាសកើត ជំងឺនេះច្រើនជាងមនុស្សទូទៅ ព្រោះវាមានចំណែកទាក់ទងផ្នែកជំងឺតពូជផងដែរ ។ ជំងឺទឹកដក់ភាគច្រើនកើតឡើងឯកឯង តែមានជំងឺដក់ខ្លះកើតមកពីអ្នកជំងឺទិញថ្នាំភ្នែកប្រភេទខ្លះមក ប្រើប្រាស់ដោយខ្លួនឯងដូចជាថ្នាំដាក់ភ្នែកដែលមាន Corticosteroid រួមផ្សំប្រើក្នុងការព្យាបាលការរលាកបានល្អ តែវាមានផលវិបាកធ្វើឱ្យកើតជំងឺផ្សេងទៀត គឺជំងឺទឹកដក់នេះបានប្រសិនបើដាក់ថ្នាំនេះជាប់គ្នាជាច្រើនដប ។
ដូច្នេះ ដើម្បីជៀសវាងការកើតជំងឺនេះ យើងមិនគួរទិញថ្នាំដាក់ភ្នែកប្រើដោយខ្លួនឯងទេ គួរប្រើថ្នាំណាដែលគ្រូពេទ្យបញ្ជាឱ្យប្រើតែ
ប៉ុណ្ណោះ ។

លោកវេជ្ជបណ្ឌិតងី ម៉េង ប្រធានកម្មវិធីជាតិសុខភាពភ្នែក បានមានប្រសាសន៍ប្រាប់ឱ្យដឹងទៀតថា ការព្យាបាលជំងឺទឹកដក់ក្នុងភ្នែកមានច្រើនវិធី គឺសការប្រើថ្នាំ ការបាញ់កាំរស្មី និងការវះកាត់ជាដើម ។ ការជ្រើសរើសវិធីព្យាបាលណាមួយនោះអាស្រ័យទៅនឹងប្រភេទ និងសភាពធ្ងន់នៃជំងឺ ដោយគ្រូពេទ្យភ្នែកជាអ្នកត្រួតពិនិត្យថា តើគួរប្រើវិធីណាទើបអាចបានផលល្អបំផុតសម្រាប់អ្នកជំងឺ ។ នៅពេលភ្នែកម្ខាងដែលមានជំងឺទឹកដក់បានទទួលការព្យាបាលរួចហើយ គ្រូពេទ្យនឹងធ្វើការណែនាំឱ្យអ្នកជំងឺ ធ្វើការការពារភ្នែកម្ខាងទៀតកុំឱ្យកើតមានជំងឺនេះដែរ ។ ដោយសារតែជំងឺទឹកដក់រមែងកើតលើភ្នែកទាំងសងខាង ការការពារអាចធ្វើតាមរយៈការបន្តក់ថ្នាំ ការបាញ់កាំរស្មី ឬការវះកាត់ ព្រោះប្រសិនជាទុកចោលរហូតកើតជាជំងឺទឹកដក់ហើយ ទើបទៅព្យាបាលភ្នែកដែលខូចហើយនោះមិនអាចត្រឡប់ដូចដើមទេ ។

ការព្យាបាលគ្រាន់តែអាចគ្រប់គ្រងសម្ពាធទឹក ក្នុងភ្នែកឱ្យនៅធម្មតា និងជួយធ្វើឱ្យភ្នែកមិនបន្តខូចតទៅទៀតបាន ។ ការប្រើថ្នាំភ្នែកក្នុងការព្យាបាលជំងឺទឹកដក់ជាវិធីដែលបានផល និងនិយមខ្លាំងជាទីបំផុត ។បច្ចុប្បន្ននេះមានថ្នាំបន្តក់ភ្នែកព្យាបាលជំងឺទឹកដក់ជាច្រើន ប្រភេទដែលប្រើបានផលល្អក្នុងការបញ្ចុះសម្ពាធទឹកក្នុងភ្នែក គឺក្រុម Prostaglandine ដែលថ្នាំក្រុមនេះផ្តល់ភាពងាយស្រួលដល់អ្នកជំងឺខ្លាំងណាស់ ភាគច្រើនត្រូវដាក់ម្តង១តំណក់ ហើយមួយថ្ងៃដាក់តែម្តងប៉ុណ្ណោះ នៅពេលល្ងាច ឬមុនពេលចូលគេង ។ ផលប៉ះពាល់ដែលអាចកើតមាន គឺអាចមានអាការភ្នែកក្រហមក្នុងពេលនេះ តែអាចបាត់ទៅឯកឯង ឬក្រោយពេលប្រើថ្នាំប្រហែល១ម៉ោង អាការភ្នែកក្រហមនឹងថយចុះ ។

ថ្នាំបញ្ចុះសម្ពាធទឹកភ្នែកក្រុម Prostaglandine ប្រភេទ Travatan ខ្លះរឹតតែផ្តល់ភាពងាយស្រួលដល់់អ្នកជំងឺថែមទៀត ព្រោះ មានប្រសិទ្ធភាពខ្ពស់អាចរក្សាក្នុងសីតុណ្ហភាពធម្មតាក្នុង បន្ទប់មិនចាំបាច់ក្លាសេ្សទឹកកក ។ ទោះជាយ៉ាងណាក៏ដោយអ្នកជំងឺគួរអានក្រដាសថ្នាំជាមុន ដើម្បីដឹងថាលោកអ្នកប្រើថ្នាំបែបណា ដើម្បីទទួលបានផលប្រយោជន៍ខ្ពស់បំផុតពីការព្យាបាលនិងរក្សាជំងឺ នេះ ៕

សុខភាពថ្ងៃនេះ

Sunday, December 30, 2012

ស្វែងយល់ពីជំងឺទឹកដក់ក្នុងភ្នែកនិងវិធីព្យាបាល

អត្ថបទអានច្រើនបំផុត

ក្រុមអត្ថបទ

ចំណាត់ក្រុមអត្ថបទ

អត្ថបទតាមខែ

ភ្ញៀវចូលទស្សនា

មន្ទីរពេទ្យគន្ធបុបា្ផ