ការសិក្សាជាច្រើនអះអាងថា ការគេងមិនលក់គឺជាដើមចមនាំជំងឺ។ បញ្ហាដំណេកក៏អាចនាំឲ្យមានកត្តាប៉ះពាល់ទាំងផ្លូវកាយ និងផ្លូវចិត្តដូចជា ការធាត់ដុះក្បាលពោះ ធាត់ញ៉ុកខ្លាញ់ការកើតទុក្ខក្រៀមក្រំ លើសឈាម និងចុះខ្សោយការចងចាំ។
វេជ្ជបណ្ឌិតឈៀន យី ស៊ូ ជាអ្នកដឹកនាំការស្រាវជ្រាវមកពីមន្ទីរពេទ្យក្រុងតៃប៉ិ និងក្រុមអ្នកស្រាវជ្រាវបានប្រើទិន្នន័យសុខភាពជាតិនៃពលរដ្ឋ សរុប២លាននាក់។ បន្ទាប់ពីការតាមដានរយៈពេលបួនឆ្នាំក្រោយមកគេឃើញថា អត្រា១,៦ភាគរយនៃមនុស្សដែលមានអាការគេងមិនលក់ ប្រឈមនឹងជំងឺគាំងបេះដូង ខណៈអ្នកដែលគេងលក់ស្កប់ស្កល់់វិញប្រឈមនឹងរោគទាំងនេះតិចតួច ត្រឹមតែ០,៧៦ភាគរយប៉ុណ្ណោះ។
ចំណែកអត្រា១១,២ភាគរយនៃអ្នកគេង មិនលក់អាចកើតជំងឺដាច់សរសៃឈាមខួរក្បាល ខណៈអត្រាអ្នកគេងលក់ធម្មតាវិញមាន៦,៥ភាគរយដែលប្រឈមនឹងជំងឺ នេះ។
ក្រុមអ្នកស្រាវជ្រាវអះអាងថា ការគេងមិនលក់ពិតជាពាក់ព័ន្ធទៅនឹងសរសៃឈាមបេះដូង ព្រមទាំងខួរក្បាលមែន៕ (អត្ថបទដកស្រង់)
